Postrowne słowo ::

Witajće k nam na internetowe strony Załožby za serbski lud!

Dnja 31. měrca 2011 buch jako předsydka Załožboweje rady znowa wuzwolena. To je za mnje wulka česć a dopokaz za to, zo sym w zašłych lětach swoje nadawki po swojich móžnosćach spjelniła.

Z tutym nalětnim posedźenjom je Załožbowa rada swoju mjeztym

5. legislaturnu periodu zakónčiła, kotrejež najwjetši wuspěch bě bjezdwěla podpisanje druheho financneho zrěčenja dnja 10. julija 2009. Z tym je znajmjeńša hač do lěta 2013 tróšku wěstoty za planowanje w institucionalnym a projektowym dźěle date.  

Nowa dźěłowa doba Załožboweje rady a zjawnoprawniskeje załožby tež njebudźe 

runjewon lochka a bjezstarostna. Zalutowanja na wšěch runinach steja tež za serbske kulturne dźěło na dnjowym porjedźe. 

Mój najwažniši nadawk widźu we tym, zahajeny proces přestrukturowanja serbskeho institucionalneho a projektoweho dźěła wuspěšnje dale wjesć a formy namakać, zo móhłoj so serbska rěč a kultura zdźeržeć a dale wuwiwać.

To so nam jeničce w mjezsobnym dźěle a dorozumjenju poradźi. Na to so wjeselu!  

Přeprošuju Was wutrobnje, poskitki Załožby za serbski lud wužiwać.

Waša Lejna Theurigowa

žiwjenjoběh (PDF)