Wupisanje dźěłowych městnow
Serbska kulturna informacija (SKI) w Budyskim Serbskim domje je znaty magnet za wopytowarjow Łužicy z tu- a wukraja, ale tež woblubowane zetkawanišćo Serbow.
Pytaće za dźěłom z wotměnjawymi nadawkami? To mamy! Dźěło při ličaku, ale tež we předawanju, na wikach po cyłym kraju abo na wšelakich zarjadowanjach - zhromadnje w nazhonitym a wjesołym teamje!
Pytamy koleginu/kolegu, kiž nas dźělnje (20 - 25 h/tydźeń) při našim mnohostronskim dźěle podpěra. Městno chcemy wot 1. januara 2024 wobsadźić.
Što słuša do Wašich nadawkow?
- hladanje internetowych poskitkow SKI (online shop, kulturna protyčka)
- podpěra na polu marketinga (wuwiće nawěškow/wabjenje)
- wobdźěłanje online skazankow
- informacija wopytowarjow a wobdźěłanje naprašowanjow (direktnje a online)
- dźěło z tworowym systemom, nakup a předań tworow
- prezenca na regionalnych a swójskich zarjadowanjach
Što sebi wot Was přejemy?
- přećelne a wotewrjene wašnje we wobchadźe z hosćimi a kupcami
- kreatiwnosć a organizatoriske kmanosće
- wobknježenje serbskeje rěče w słowje a pismje (njetrjeba być "perfektne")
- znajomosće we wobchadźe z kompjuterom
- nazhonjenja na polu marketinga, turizma a ze socialnymi medijami bychu byli idealne
- znajomosće jendźelšćiny abo/a słowjanskich rěčow (znajmjeńša zakładnje)
- zwólniwosć k dźěłu tež hdys a hdys na kóncu tydźenja
Što Wam skićimy?
Skićimy Wam wotměnjawe nadawki a wobšěrne zawjedźenje do noweho skutkowanja. Dźěłowy čas wučinja 20 hodźin (po wotrěčenju hač do 25) wob tydźeń. W ramiku wotewrjenskich časow móžeće sej tutón fleksiblnje zarjadować, tež homeoffice je zdźěla móžny.
Mzdu płaćimy po tarifje TV-L, wotwisnje wot wukubłanja hač do EG8.
Prawidłowny poskitk dalekubłanjow je samozrozumliwy, runje tak starobne zawěsćenje a druhe lěpšiny zjawneje słužby.
Dźěłowe městno je w Budyšinje a chcemy je rady wot 1. januara 2024 wobsadźić.
Wjeselimy so na Waše požadanje hač do 30. nowembra 2023 digitalnje na
stiftung-bautzen@sorben.com.
Jelizo maće prašenja, zawołajće runjež na Wašich přichodnych kolegow w SKI, telefon 03591 42105.
Załožba za serbski lud spěchuje serbske institucije a projekty. Za wobdźěłanje spěchowanskich próstwow ma so tak chětř kaž móžno dźěłowe městno wobsadźić jako:
wobdźěłar/-ka spěchowanskich próstwow (m/ž/d)
Nadawki su mnohostronske a wobjimuja mjez druhim:
- wobdźěłanje, přizwolenje a pruwowanje projektoweho spěchowanja kaž tež wujednanje a wotličenje spěchowanskich zaměrow
- wobsahowe a ličenske pruwowanje zapodatych podłožkow
- poradźowanje projektowych nošerjow při spěchowanju a
- podpěru při zwoprawdźenju projektow załožby.
Za to pytamy wosobu:
- z wysokošulskim, fachowym abo přirunajomnym wotzamknjenjom na polu hospodarstwa, zarjadnistwa abo kulturnych wědomosćow abo z wotpowědnymi powołanskimi nazhonjenjemi
- z kmanosću, ertnje a pisomnje w serbskej rěči komunikować
- ze znajomosćemi kulturnych, regionalnych a towarstwowych aktiwitow w serbskim sydlenskim rumje kaž tež zwonka Łužicy
- z nazhonjenjemi na polu projektoweho managementa, wobhospodarjenja budgetow a eficientneho wobchada z digitalnymi gratami, dokumentami a procesami
- a w idealnym padźe ze znajomosćemi přizwolenskeho prawa
Załožba skići Wam dźěło w přećelnym a nazhonitym teamje, naročne nadawki, fleksibelny dźěłowy čas, móžnosć za homeoffice a wobšěrne, intensiwne zawjedźenje do noweho skutkowanja. Dźěłowy čas wučinja 40 h wob tydźeń, mjenje je po dorěčenju móžno. Dźěłowe městno je w Budyšinje a je wobmjezowane hač do inkluziwnje 07/2025.
Mzdu płaćimy po tarifje TV-L (wotwisnje wot wukubłanja hač do EG9).
Smy Waš zajim zbudźili?
Wjeselimy so na Waše požadanje. Podłožki pósćelće prošu digitalnje na stiftung-bautzen@sorben.com.
Hdyž maće prašenja, narěčće prošu
Katharinu Čornakowu
nawodnicu teama
tel.: 03591 550-310
cornak-stiftung@sorben.com
Załožba je připóznata partnerka powołanskeje akademije Sakskeje - Statna studijna akademija (BA) Budyšin za wukubłanje w praksy.