Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Wy maće inowatiwnu a naslědnu ideju, kak móže so we Wašej wokolinje nałožowanje serbskeje rěče a identity we wšědnym dnju spěchować? Potom wobdźělće so na našim idejowym wubědźowanju!
Nětko ideju zapodać

Idejowe wubědźowanje "Rěč wjaza. Rěc zwězujo. Sorbisch verbindet."

Ideja

Maće inowatiwnu a naslědnu ideju, zo by serbšćina a serbska identita we Wašej kónčinje lěpje widźomna a dožiwjomna była? Potom je idejowe wubědźowanje Załožby za serbski lud "Rěč wjaza. Rěc zwězujo. Sorbisch verbindet." to prawe za Was! Požadajće so wo myto, z kotrymž hodźa so Waše projektowe ideje krótkodobnje a njeběrokratisce zwoprawdźić.

Pomhajće z Wašej ideju, wšědne nałožowanje serbšćiny spěchować, identitu serbskeho ludu skrućić, dwurěčnu zhromadnosć sylnić a inspirěrowace zetkanja zmóžnić!

Wotběh

Požadajće so z Wašej ideju pola Załožby za serbski lud! Za to namakaće w času wot 1. septembra 2021 hač do 7. nowembra 2021 tu online-formular k zapodaću projektoweje ideje. Jenož z tutym formularom zapodate požadanja so we wubědźowanju wobkedźbuja!

Spožča so pjenježne myta w cyłkownej wysokosći 80.000 EUR (hač do 20 x 500 EUR, 10 x 1.000 EUR, 6 x 5.000 EUR a 3 x 10.000 EUR). Dobyćerjo so spočatk decembra 2021 wozjewja. Na swjedźenskim zarjadowanju so jim myta přepodadźa.

Mytowane ideje měli so hač do 31. decembra 2022 zrealizować.

Wuměnjenja wubědźowanja

Štó smě so wobdźělić?

Na idejowym wubědźowanju smědźa so priwatne wosoby, towarstwa, zwjazki, komory, socialni nošerjo, pěstowarnje, šule, horty, młodźinske kluby kaž tež komuny, komunalne a sociokulturne zarjadnišća wobdźělić. Swoje sydło resp. bydlenje dyrbja zasadnje w Němskej měć.

Jedyn z podpisacych požadarjow měł znajmjeńša 18 lět być.

Štó njesmě so wobdźělić?

Wobdźělić njesmědźa so politiske strony a wolerske skupiny, iniciatiwy bjez swójskeje prawokmaneje wosoby, přirodne a juristiske wosoby, kiž su wotedali wobkrućenje město přisahi po § 802c porjada za ciwilnoprawniske procesy we wersiji wozjewjenja z dnja 5. decembra 2005 (BGBl. I str. 3202; 2006 I str. 431; 2007 I str. 1781), naposledk změnjenej přez artikl 2 zakonja z dnja 12. julija 2018 (BGBl. I str. 1151), abo po § 284 porjada wo wotedawkach we wersiji wozjewjenja z dnja 1. oktobra 2002 (BGBl. I str. 3866; 2003 I str. 61), naposledk změnjenej přez artikl 6 zakonja z dnja 18. julija 2017 (BGBl. I str. 2745), abo kiž su winowate, tute wobkrućenje wotedać, kaž tež přirodne a juristiske wosoby, kotrychž ideologiske, politiske abo nabožne wusměrjenje  zaměrej Załožby za serbski lud a wobsahej wubědźowanja njewotpowěduje.

Kriterije pohódnoćenja

W srjedźišću steji žiwa serbska rěč a identita. Waše ideje njejsu tematisce a geografisce wobmjezowane, dyrbjeli pak realizujomne, inowatiwne  a naslědne być. Dale so pohódnoća, hač docpěja so pozitiwne wuskutki za mnohich ludźi, kak so projekt w regionje wotbłyšćuje, kajki je wothłós w zjawnosći a hač su w datym padźe kooperaciscy partnerjo zawjazani.

Wo fachowe pohódnoćenje projektow postara so njewotwisna jury.

Kotre wužiwanske prawa maja so wobkedźbować?

Požadar ma awtorske prawo na zapodatej ideji. Požadar je winowaty, Załožbje za serbski lud wšitke prawa přewostajić, kotrež su za rozmnoženje a wozjewjenje ideje a za wabjenje we wobłuku wubědźowanja trěbne. Předewšěm awtorizuje požadar Załožbu za serbski lud (do abo po mytowanju), informacije wo projekće publikować.   

Ze zapodaćom požadanskich podłožkow přihłosuje požadar, zo so w padźe mytowanja mjeno toho, kiž je ideju zrodźił kaž tež konkretna projektowa ideja zjawnje wozjewi.  To nastupa tež wysokosć pjenježneho myta a městno, na kotrymž so projekt zrealizuje.

Dale je wobdźělenje jeničce móžne, hdyž požadar nahrawanju widejow a zwukow, zhotowjenju fotow a jich pozdźišemu njewobmjezowanemu wužiwanju ze stron załožby a jeje kooperaciskich a medijowych partnerow přihłosuje.

Kotra zamołwitosć a kotre winowatosće nastanu z wobdźělenjom?

Požadar so zawjazuje, zo ze zwoprawdźenjom projekta do zapodaća požadanja njezapočnje a zo pjenježne myto jenož za njón zasadźi. K wot załožby postajenemu terminej maja  mytowani wěcnu rozprawu a digitalny fotowy dopokaz wo wuspěšnym přewjedźenju projekta zapodać.

Z připósłanjom projektoweje ideje požadar přihłosuje, zo smě so załožba nastupajo zjawnostneho dźěła kaž tež w přihotach na posedźenja jury z nim skontaktować. Rozsudźace gremije wubědźowanja móža so tohorunja direktnje na požadarja wobroćić, su-li dalše detaile trěbne.

Nimo toho wobkrući požadar korektnosć swojich podaćow. Wopačne podaća wjedu k wuzamknjenju z wubědźowanja. Požadar je winowaty, załožbje kóždy čas wěrne informacije wo stawje realizacije projekta podawać. Dohlad do hódnoćenja zapodatych projektow so njeposkića. Hódnoćenja projektow njebudu zjawnje přistupne.

Štóž so wobdźěli, čini to na swoje riziko a swoju zamołwitosć. Požadar je za korektnosć datow zamołwity, kotrež we wobłuku wubědźowanja podawa.

Za realizowanje projektoweje ideje nakupjene předmjety su 5 lět na zaměr projekta wjazane a njesmědźa so w tutym času předać.

W padźe dobyća měł so w zwisku z předstajenjom projekta na př. na webstronach, ćišćanych materialijach atd. slědowacy pasus wo spěchowanju jewić: „Tuta naprawa so podźělnje financuje wot Załožby za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.“ Po móžnosći měło so tež logo Załožby za serbski lud na přihódnym městnje wozjewić.

Kak wo dobyću zhoniće?

Po posedźenju jury so wšitcy požadarjo informuja, hač k mytowanym słušeja abo nic. Z informaciju dóstanu mytowani tež link na formular za wupłaćenje myta. Tule maja detaile wo dalšim wotběhu projekta wobkrućić, bankowy zwisk za wupłaćenje myta kaž tež dobu realizowanja podać.

Kak so myta wupłaća?

Wšitke myta so jónu a jako cyłkowna suma hač do kónca lěta 2021 wupłaća. Za wupłaćenje ma so próstwa z wotpowědnym formularom najpozdźišo hač do 15. decembra 2021 zapodać.  Jeli so projektowa ideja zwoprawdźić njehodźi, ma wobdźělnik myto wróćić.

Datowy škit

Załožba za serbski lud zběra a wužiwa na wosobu so poćahowace daty jeničce w zwisku z wubědźowanjom. Wužiwanje respektiwnje składowanje tutych datow je zakonsce předpisane. Daty sposrědkuja so jeničce čłonam jury za pohódnoćenje projektow.

Přihłosowanje płaći zdobom za sposrědkowanje datow prawniskodohladowanskemu zarjadej k pruwowanju. Maće kóždy čas móžnosć, Wašu přezjednosć za składowanje na wosobu so poćahowacych datow pisomnje abo z mejlku cofnyć a sej šmórnjenje datow wužadać. Dalše informacije wo datowym škiće a wo wužiwanju datow nadeńdźeće na našej stronje k škitej datow.

Kónčne wozjewjenje

Ze zapósłanjom požadanskich podłožkow akceptuje požadar wuměnjenja wobdźělenja kaž tež zasady za datowy škit. Lěpšeje čitajomnosće dla so při formulacijach mjez splahami wuraznje njediferencuje; přiwšěm so podaća přeco na přisłušnikow wšitkich splahow poćahuja.