Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Wubědźowanja

W prawidłownych wotstawkach so přewjedu wubědźowanja, kotrež připóznawaja intensiwne rozestajenje ze serbskeju rěču a literaturu a serbskimi temami powšitkownje.

K tomu liča nachwilne wupisanja, wubědźowanje “Rěčam přichilena komuna – serbska rěč je žiwa", kotraž so w Braniborskej runje tak kaž w Sakskej přewjedźe, a literarne wubědźowanje w zhromadnym dźěle z nakładnistwom Domowina.

Literarne wubědźowanje

Zhromadnje z Ludowym nakładnistwom Domowina wupisa Załožba za serbski lud kóžde druhe lěto wubědźowanje serbskeje rěče a literatury.

Na wubědźowanju, kiž ma zaměr spěchowanja literarneho dorosta, móža so zajimcy hač do staroby 35 lět wobdźělić. Jury hódnoći w kategorijach lyrika, krótkoproza a dlěša proza/dramatika.

Najlěpše twórby wozjewja so w publikacijach Ludoweho nakładnistwa Domowina, kaž na přikład w ediciskim rjedźe Paternoster.

Literarne wubědźowanje 2019

wupisanje hornjoserbsce

Mytowanske zarjadowanje literarneho wubědźowanja 2019/2020

Mytowanske zarjadowanje literarneho wubědźowanja přewjedźe so pjatk, dnja 17. januara 2020 w Budyskim "Wjelbiku". Wubědźowanje, kotrež so k prěnjemu razej hižo před wjace hač 40. lětami wotmě, so znowa zhromadnje wuhotowaše wot Ludoweho nakładnistwa Domowina a Załožby za serbski lud.

Mjez prošenymi hosćemi bě tójšto młodych pisacych, kotřiž prěni króć literarnu twórbu zapodachu, ale tež někotryžkuli, kiž so wospjet wobdźěli. Dohromady 35 přinoškow wot 16 awtorow měješe jury hódnoćić. W njej skutkowachu Madleńka Šołćic, dramaturgowka NSLDź a zastupjerka intendanta za serbske dźiwadło, Lubina Hajduk-Veljkovićowa, awtorka a přełožerka z Lipska, Ingrid Hustetowa, awtorka a lektorka z Choćebuza, Pětr Thiemann, lektor za rjanu literaturu w nakładnistwje a ze stron załožby John Petrik. Zwjeselacy bě poměrnje wysoki podźěl loni zapodatych delnjoserbskich twórbow (w cyłku 7, a kóžda so mytowaše). Najmłódšemu wobdźělnikej, hakle wosomlětnemu Benej Baierej, spožči so wosebite myto (hlej deleka).

 

Dobyćerjo:

Kategorija A (basnje, lyriska proza: 12 awtorow, 23 přinoškow)

1. myto:
Annamaria Hadankec z Berlina (Kopšina) za basnje "Ranje", "Na kwasu" a "Són - realita?"

2. myto:
Jakub Wowčer za basni "Són" a "Hodowny hermank"

3. myto:
Jill-Francis Ketlicojc z Choćebuza za basni "Carśiki casa" a "Nocna klěś"

4. myto:
Maks Bagańc z Lipska za baseń "SERBSKA AWANTGARDA"

5. myto:
Damian Dyrlich z Noweje Wjeski za baseń "Błudnosće z Limericka"

Kategorija B (krótka proza: 6 awtorow, 8 přinoškow)

1. myto:
Justyna Michniuk z Choćebuza za krótkopowědančko "Pod śěźu zachodnosći"

2. myto:
Klemenc Bobka z Miłoćic za krótkopowědančko "Bjez kófrow"

3. myto:
Jill-Francis Ketlicojc z Choćebuza za fabuli "Banjawa a rjascheny" a "Łupnak a swěcka"

4. myto:
Annamaria Hadankec z Berlina (Kopšina) za krótkopowědančko "Prěnja pomoc"

5. myto:
Patricia Kralec z Drježdźan za krótkopowědančko "Skok"

Kategorija C (dlěša proza, dramatika: 4 awtorojo, 4 přinoški)

1. myto:
so njespožči

2. myto:
Annamaria Hadankec z Berlina (Kopšina) za powědančko "Nowy swět"

3. myto:
Pětr Dźisławk z Chasowa za powědančko "Na narodninach"

3. myto:
Oleg Derepasko z Amsterdama za powědančko "Góle we góli"

5. myto:
Patricia Kralec z Drježdźan za powědančko "Ke kermuši"

Wosebite myto (za najlěpši přinošk wobdźělnika/cy pod 16 lětami)

spožči so Benej Baierej z Pančic-Kukowa za baseń "Spi, dźědo, spi!"

 

fota: Hanka Šěnec


Wupisanje wubědźowanja wo wobdźělenje

Wustajeńca wizuelneho wuměłstwa 2019/2020

PŘECHOD ÜBERGANG PREHOD 03
Wobrazy našeje krajiny. Bilder einer Landschaft. Slike različnih krajin.

Wupisanje wubědźowanja je přihot na zhromadny projekt wustajeńcy z Muzejom moderneho wuměłstwa Korutanska - MMKK w Celovecu/Klagenfurt (Rakuska) a Muzejom za moderne a načasne wuměłstwo - KGLU (Koroška galerija likovnih umetnosti) w Slovenj Gradecu (Słowjenska).

Projekt a hesło wubědźowanja "PŘECHOD" pokročujetej Dny serbskeje kultury 2014 w Celovecu/Kla-genfurt kaž tež prezentaciju wurězkow z toho w lěće 2015 w Budyšinje, Choćebuzu a Slepom. "Wobrazy našeje krajiny. Bilder einer Landschaft" je titul basniskeho cyklusa serbskeho basnika Kita Lorenca (1938-2017), kotryž bě 1967 w Ludowym nakładnistwje Domowina wušoł, kaž tež na cyklus so złožowaceho filma Konrada Herrmanna z lěta 1972.

Wosebje witane je při požadanjach wo wobdźělenje na wustajeńcy kritiske, tež interdisciplinarne rozestajenje z irewersibelnymi změnami kultury a přirody jako sćěh industrielneho wuwića, zničenja žiwjenskeho ruma, při- a wotpućowanja, ćehnjenja mjezow, wobtwarjenja, njestrukturowaneho rozšěrjowanja sydlišćow a podobnym kaž tež zaběranje z prašenjemi dołhodobneje skutkownosće kultury.

Posledni termin požadanja: 14.05.2018

Kontakt:
Anka Němcec
telefon: 03591 550319
a.niemz-stiftung@sorben.com

trěbne dokumenty:
Wupisanje wubědźowanja.pdf
Wuměnjenja wustajenja.pdf
Formular za požadanje.pdf


Wubědźowanje "Rěčam přichilena komuna - Serbska rěč je žiwa"

Swobodny stat Sakska a Kraj Braniborska staj w lěće 2004 k prěnjemu razej do wubědźowanja wo rěčam přichilenu komunu pod hesłom "Serbska rěč je žiwa" namołwjałoj.

Wot Radow za serbske naležnosće Swobodneho stata Sakskeje a Kraja Braniborskeje iniciěrowane wubědźowanje ma k tomu słužić, zo so w komunach serbskeho sydlenskeho ruma nimo dopjelnjenja zakonskich winowatosćow nastupajo zdźerženje a dalewuwiće serbskeje rěče a kultury nowe kreatiwne ideje zrodźa a ze žiwjenjom napjelnja.

Swobodny stat Sakska a Kraj Braniborska stej w lěće 2004 k prěnjemu razej do wubědźowanja wo rěčam přichilenu komunu pod hesłom "Serbska rěč je žiwa" namołwjałoj. Patronatstwo přewzałoj běštaj tehdyšej prezidentaj krajneju sejmow Sakskeje a Braniborskeje Erich Iltgen a Herbert Knoblich.

K druhemu razej bu wubědźowanje zhromadnje přewjedźene a 7. junija 2010 w Serbskim kulturnym centrumje Slepo swjatočnje wotewrjene. Znowa staj prezidentaj krajneju sejmow Sakskeje a Braniborskeje patronatstwo přewzałoj - tónraz dr. Matthias Rößler za Hornju a Gunter Fritsch za Delnju Łužicu.

Třeće wubědźowanje wo rěčam přichilenu komunu w Sakskej wotewri w zastupnistwje patronata prezidenta Sakskeho krajneho sejma dr. Matthiasa Rößlera wiceprezidentka Andrea Dombois 3. februara 2017 w Budyskim Serbskim domje. Wone traješe hač do 31. decembra 2017. Na nim wobdźěli so cyłkownje 14 městow a gmejnow serbskeho sydlenskeho ruma Sakskeje. Wot Rady za serbske naležnosće, sobudźěłaćerjow Załožby za serbski lud a Domowiny z.t. wuhotowane mytowanske zarjadowanje wotmě so 2. februara 2018 w Slepom.

Katalog z kriterijemi za wobdźělenje na wubědźowanju (pdf)
Dobyćerjo wubědźowanja 2017 (pdf)