Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Wot załožby spěchowane projekty

W mjeztym nimale 30 lětach swojeho wobstaća je Załožba za serbski lud wjele wšelakorych projektow spěchowała. Projektowe spěchowanja zašłych lět su tule zestajane.

Wo projektowym spěchowanju

Jedyn z wažnych terminow w kołoběhu spěchowanskeho lěta Załožby za serbski lud je 30. september, hdyž kónči doba zapodaća próstwow wo spěchowanje projektow za cyłe přichodne lěto abo prěnje połlěto přichodneho lěta. Dohromady tři terminy a z tym zwjazane doby woznamjenjeja kruty turnus zapodaća próstwow wob lěto. W mjez nimi ležacym času so zapodate próstwy wot teama spěchowanje wobdźěłaja.

dale čitać

Zapodata próstwa wo spěchowanje přeběži mnohe etapy wobdźěłanja, kotrež su na jednej stronje čisto formalne, na druhej stronje pak bazuja na wobstajnym dialogu a wuskim zhromadnym dźěle mjez požadarjom, wobdźěłarjom a rozsudźacymi. Po tym, zo je próstwa w zarjedźe dóšła, so wona registruje a w hrubym pruwuje, hač je po směrnicach k spěchowanju kmana. Pisaja so doporučenja za fachowu přiradu, kotrež wobsahuja krótke wopisanje projekta a namjet wysokosće spěchowanja. Je-li trěbne, so wotewrjene prašenja hižo w tutej fazy ze stajerjom próstwy wothłosuja.

Po zeńdźenju fachoweje přirady za projektowe spěchowanje, kotraž so zestaja ze serbskich čłonkow a čłonow Załožboweje rady a jich zastupjerkow a zastupjerjow, dóstanje załožbowy wobdźěłar projekta wot njeje doporučenje, po potrjebje po słyšenju fachowcow. Dale zdźěła so informacija za požadarja, respektiwnje spožča so dowolnosć za dočasny započatk, jeli-zo je požadar wo to prosył.

Hdyž su wšě podłožki zwjedźene a prašenja rozrisane, napisa wobdźěłar/-ka naćisk přizwolenja, kiž so potom po wobsahu a hospodarsce pruwuje (princip 6 wočow). Ramik spěchowanja twori směrnica, při přesadźenju tuteje nałožuja so krute prawidła. Indiwiduelne rozsudy su přiwšěm móžne, dołhož so spěchowanske směrnicy, powšitkowna spěchowanska praksa a zasada jenakosće ("Gleichheitsgrundsatz") njezranja.

Zo by so wuměna mjez sobudźěłaćerjemi wšěch wotnožkow Załožby zaručiła, tworja wšitcy, kiž maja z projektowymi próstwami činić, tak mjenowany wirtuelny team. Tutón so prawidłownje - zwjetša we widejowej konferency - k jednotliwym projektam wothłosuje, wo stawje wobdźěłanja próstwow wuměnja a interne standardy formuluje. Do teama słušeja wobdźěłarjo projektowych próstwow, ale tež pruwowar a zamołwita za controlling.

Mnohostronske spěchowanje

Naležnosć Załožby za serbski lud, spěchować projekty ze zaměrom, serbsku rěč a kulturu jako wuraz identity serbskeho ludu zdźeržeć a dale wuwiwać, rozhałžkuje so do cyłkownje 14 wobłukow, hlej předmjet spěchowanja. A dale je tam rozpisane, štó wšo móže wo spěchowanje prosyć: wot towarstwow a kulturnych skupin, přez hamty, gmejny, a kubłanske institucije, hač k druhim přirodnym a juristiskim wosobam z bydlenjom abo sydłom w serbskim sydlenskim rumje Sakskeje a Braniborskeje.

Što z projektowym spěchowanjom dobudźemy?
Čiłe serbske a kulturne žiwjenje we wšelakich wobłukach a přez generacije, serbsko rěčne rumy a fungowace socialne cyłki, wuwiće a zesylnjenje serbskeje identity, sebje zrozumjenje, hordosć a narodne wědomje, kaž tež wulki čestnohamtski angažement - bychu byli někotre z móžnych wotmołwow na tute prašenje.

Deleka wozjewjeny přehlad pokaza na přikładźe spěchowanych towarstwow w lěće 2019 nahladnu ličbu ludźi, kotrychž je Załožba spěchowała.

W cyłkownje 18 chórowych abo instrumentalnych towarstwach po cyłej Łužicy na přikład, skutkuja 505 čłonow. 68 su instrumentalisća a 76 liča do dorosta. Najwjetše chórowe towarstwo w Hornjej Łužicy je 1. serbska kulturna brigada z.t. (Sorb. Jugendensemble Bautzen e.V.) z 64 čłonami (młodźina) a 8 instrumentalistami. Najwjetši chór Delnjeje Łužicy je Błośanski žeńskecy chor Lubin z.t., kotryž wustupuje z 23 dorosćenymi.

Zajimawy je tež přehlad rejowanskich skupinow. W dohromady 9 skupinach a ansamblach po cyłej Łužicy so 261 wosobow angažuje a za reje hori.

Wot dźiwadłowych skupinow su dotal tři wo spěchowanje prosyli. Wšitke su z Hornjeje Łužicy, najwjetša z nich je Lajska dźiwadłowa skupina Šunow-Konjecy.

Přehlad spěchowanych towarstwow a jich čłonow

Přehlady spěchowanych projektow

hač do lěta 2019 předleža dokumenty jenož w němskej rěči