Idejowe wubědźowanje
Rěč zwjazuje. Rěc zwězujo. Sorbisch verbindet - 2023

Serbska rěč a z njej kultura a identita su we Łužicy žiwe něhdźe 14 lětstotkow. Rěč a kultura stej z toho časa přeco zaso změnam podležałoj. Wosebje wot 19. lětstotka sem bě serbska rěč přiběraceje industrializacije we Łužicy dla wohrožena. Wobsteješe a wobsteji přeco hišće strach, zo so serbska rěč přez rěč němskeje wjetšiny narunuje a z tym zhubi.
Historisce zrosćena dwurěčnosć płaći mjeztym jako znamjo jónkrótnosće Łužicy a so dźeń a bóle jako wobohaćenje hódnoći.

Zaměr idejoweho wubědźowanja "Rěč zwjazuje. Rěc zwězujo. Sorbisch verbindet." je, ideje a iniciatiwy spěchować, z kotrymiž móže so originelnje, regionalnje skutkownje, směrodajnje a widźomnje na serbstwo skedźbnić. Dźe při tym wo podpěru a dalewuwiće dwurěčnosće, w formje kotraž přinošuje, zo so serbska rěč zachowa.

Přejemy sej wobdźělenje na idejowym wubědźowanju z kóždychžkuli wobłukow. Tež wuwiwanje projektowych konceptow je prašane. Synergije a aktualne temy witamy.

Jedne z najbóle fundamentalnych idejowych zwoprawdźenjow wšěch časow bě wunamakanje žehlawki Thomasa Edisona. To njebě připad. Smy žehlawku z dobreje přičiny jako symbol za idejowe wubědźowanje a wobstatk loga wupytali. Edison je swoje ideje ekstremnje strukturowane wuwiwał. Hladać přez hranicy swojeje wědy, słušeše k tomu.

Z wšěch we wubědźowanju zapodatych idejow so 17 najlěpšich mytuja, z čimž so realizowanje podpěra.
Za to steja cyłkownje 70.000 EUR k dispoziciji.
Sćěhowace mytowanske pjenjezy wupisamy:
3 x 10.000,00 EUR, 4 x 5.000,00 EUR, 4 x 3.500,00 EUR, 6 x 1.000,00 EUR.

Wuměnjenja k wobdźělenju na wubědźowanju a formulary sčasom do zahajenja 5-tydźenskeje doby zapodaća wozjewimy. Předwidźane je wozjewjenje za měrc/apryl 2023.

Za pohódnoćenje idejow powoła Załožba za serbski lud njewotwisnu, neutralnu jury, w kotrejž maja serbske regiony, akciske wobłuki, generacije a splahi wuwažene zastupjene być.

Namjety za čłonstwo w jury móžeće hač do 24.04.2023 pod ideenwettbewerb@sorben.com zapodać.

Za jury pytamy wosoby, kiž njejsu pola Załožby za serbski lud ani pola Domowiny - Zwjazka Łužiskich Serbow z. t. přistajeni, ale přiwšěm problemy a potrěbnosće w zwisku z hajenjom a zachowanjom serbskeje rěče a kultury znaja. Namjety za jury maja prošu mjeno a kontaktne daty namjetowaneje wosoby kaž tež krótke wopodstatnjenje namjeta wobsahować. Zawěsćene dyrbi być, zo je wotpowědna wosoba namjetej a přepodaću kontaktnych datow přihłosowała.