Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Myto Ćišinskeho 

Myto Ćišinskeho je najwjetše wuznamjenjenje Serbow. Z mytom, kotrež Załožba za serbski lud kóždej dwě lěće spožča, so wurjadne wukony na polu serbskeje kultury, wuměłstwa abo wědomosće hódnoća a wjelelubjace spočatki w tutych wobłukach spěchuja.

Myto Ćišinskeho přepoda so w spomnjeću na Jakuba Barta-Ćišinskeho (1856-1909), klasikarja serbskeje literatury.

Wo spožčenju Myta Ćišinskeho a spěchowanskeho myta k Mytu Ćišinskeho rozsudźi kuratorij wotpowědnje statutej. Kuratorijej přisłušeja čłonojo serbskich towarstwow z Hornjeje a Delnjeje Łužicy. Kuratorij nawjeduje předsydka/předsyda Załožboweje rady. Čłonojo kuratorija wólbneje periody 2019-2020 su:

  • Marko Kowar - předsyda Załožboweje rady
  • Manfred Hermaš - zastupjer Domowina z. t. z Hornjeje Łužicy
  • Marion Stenselowa - zastupjerka Domowiny z. t. z Delnjeje Łužicy
  • Jan Bělk - zastupjer Zwjazka serbskich wuměłcow z. t.
  • Leńka Thomasowa - zastupjerka Zwjazka serbskich spěwarskich towarstwow z. t.
  • Měrana Cušcyna - zastupjerka Maćicy Serbskeje z. t.
  • Martina Nowakojc - zastupjerka delnjoserbskeho wotdźěla Maćicy Serbskeje z. t.
  • dr. Jana Šołćina - zastupjerka Serbskeho šulskeho towarstwa z. t.
  • dotal žadyn zastupjer pomjenowany - zastupjer/ka Zwjazka serbskich studowacych

K prěnjemu razej bu Myto Ćišinskeho 1995 Antonej Nawce za jeho skutkowanje jako literat a přełožowar kaž tež za jeho serbsku rěč spěchowacy žiwjenski skutk přepodate. Spěchowanske myto dósta w samsnym lěće Róža Domašcyna za jeje inowatiwne a sebjewědome tworjenje w minjenych lětach.

Dalši lawreaća Myta Ćišinskeho:

Hłowne myto

Spěchowanske myto

1995

Anton Nawka (1913-1998)
Myto Ćišinskeho spožči so jemu za jeho literarne, přełožerske a serbsku rěč spěchowace žiwjenske dźěło.

Róža Domašcyna (nar. 1951)
Spěchowanske myto k Mytu Ćišinskeho spožči so jej za jeje inowatiwne a sebjewědome literarne tworjenje poslednich lět.

1997

Farar Herbert Noack (1916-2011)
... za jogo wurědnu literarnu a pisnu dolnoserbšćinu konsolidujucu tworiwosć.

Fred Pětška (nar. 1962)
... za jogo grafiske źěło ako ilustrator serbskich knigłow a za jogo wuměłske statkowanje.

1999

Alfons Frencl (1946-2015)
... za jeho cyłkowne publicistisko-literarne tworjenje.

Jan Cyž (nar. 1955)
... za jeho pozbudźowace, do přichoda pokazowace kompozitoriske skutkowanje.

2001

Manfred Starosta (nar. 1941)
... za jogo rěcywědne a rěcspěchujuce statkowanje.

Dolnoserbski źiśecy ansambl z.t.
... za pśeliś dobre woplěwanje a dalejwuwiśe dolnoserbskego spiwa a reje.

2003

Marja Ulbrichec (1927-2013)
... za jeje mnohostronske wuměłske skutkowanje na polu powołanskeho serbskeho dźiwadła, "hrajo z wutrobu za lud".

Měrana Cužcyna (nar. 1961)
... za jeje mnohostronske prócowanja wo posrědkowanje serbskeje rěče a kultury předewšěm młodostnym.

2005

Pětš Janaš (1933-2021)
… za jogo wědomostne statkowanje pśi pśeslěźenju a woplěwanju dolnoserbskeje rěcy.

Tanja Donatec (nar. 1971)
… za jeje wjelelubjace wuměłske wuwiće při interpretaciji a šěrjenju hornjoserbskeho kaž delnjoserbskeho spěwa.

2009

Měto Pernak (1938-2019)
… za jogo wudawaśelske, pśełožowarske a rěcno-kulturne statkowanje w Dolnej Łužycy.

István Kobjela (nar. 1977)
… za jeho wukony jako komponist, interpret a producent hudźby za serbsku młodźinu.

2011

Benedikt Dyrlich (nar. 1950)
... za jeho literarne tworjenje, mjezy přesahowace šěrjenje serbskeje poezije kaž tež za pěstowanje słowjanskeje wzajomnosće.

Jěwa-Marja Čornakec (nar. 1959)
... za jeje wukony na polu dźěćaceje literatury a za skutkowanje jako awtorka dźiwadłowych hrow.

2013

Beno Budar (1946-2023)
... za jeho literarno-tworićelske, kulturno-stawizniske a narodno-kubłanske tworjenje a spěchowanje słowjanskeje wzajomnosće.

Michał Cyž (nar. 1977)
... za jeho pozbudźowace hudźbno-wuměłske skutkowanje a generacije přesahowace spěchowanje serbskeje rěče wosebje w swěće nowych medijow.

2015

Manfred Ladusch (nar. 1941)
... za jeho žiwjenske skutkowanje jako wurjadny žurnalist, kulturny stawiznar, awtor, referent, fachowy poradźowar, dokumentarist, narodny prócowar a pozbudźowar.

Sebastian Elikowski-Winkler (nar. 1978)
... za jogo kompozitoriske twórjenje, jogo muziko-wědomnostne a muziko-organizatoriske statkowanje a za rozšyrjenje wědy wó serbskej muzice a kulturje w tu- a wukraju.

2017

Juro Mětšk (1954-2022)
... za jeho wusahowace kompozitoriske tworjenje a slědźerske dźěło we wobłuku serbskeje hudźby.

Lubina Hajduk-Veljkovićowa (nar. 1976)
... za jeje wusahowacy přinošk k wuwiću moderneje serbskeje literatury a načasnych rěčnokubłanskich srědkow.

2019

Maria Elikowska-Winklerowa (nar. 1951)
... za jeje dołholětne a njesprócniwe skutkowanje za zdźerženje a daledawanje delnjoserbskeje rěče wšitkim generacijam a za jeje wobstajnu podpěru za serbske kulturne a trajne projekty w Delnjej Łužicy.

RADIO SATKULA, młodźinska redakcija Serbskeho rozhłosa
... za zajimawe a originelne předstajenje temow w serbskej rěči w rozhłosu, nowych medijach a zjawnosći, kotrež słuža skrućenju narodneho wědomja młodeje serbskeje generacije.

2021

Trudla Malinkowa (nar. 1955) und Jan Malink (nar. 1956)
... za jeju wusahowacu publicistisku dźěławosć na polu serbskich kulturnych stawiznow a jeju wosebity angažement we wědomostnym towarswje Maćica Serbska, w Serbskim ewangelskim towarstwje kaž tež za jeju politisko-narodne skutkowanje.

Jadwiga Kaulfürstowa (nar. 1976)
a dr. Fabian Kaulfürst (nar. 1978)
... za jeju horliwe , mnohostronske skutkowanje na polu serbskeje rěče a kultury, za zwoprawdźenje kreatiwnych projektow a za twarjenje mostow mjez Serbami a Słowjanami.

2023

Jurij Łušćanski (nar. 1951)
... za jeho mnohostronske płódne kulturne a wuměłske skutkowanje a za wobstajne wudźeržowanje stykow k słowjanskim susodam na dobro serbskeho ludu.

Gregor Kliem (nar. 1990)
... za jeho kreatiwne a zahorjace kulturne dźěło, za zamóžnosć, wšitke generacije zwjazować kaž tež inowatiwne hudźbne projekty zeskutkownjeć.



Wustawki Myta Ćišinskeho Załožby za serbski lud