Marketingowe akcije
Załožba za serbski lud organizuje wob lěto k wšelakim składnosćam, nałožkam a wjerškam wosebite marketingowe akcije, zo bychu so žiwa němsko-serbska dwurěčnosć a serbska kultura we wšědnym dnju wočiwidnišo jewili.
Akcija "sroka" k ptačemu kwasej
Akcija "sroka" je zhromadna iniciatiwa Załožby za serbski lud, Lions kluba Budyšin-Lusatia Lions a pjekarskeho zjednoćenstwa wokrjesa Budyšin, kotraž je so 2019 zhromadnje zazběhnyła. Załožba za serbski lud tule informacisku iniciatiwu tež lětsa dale wjedźe.
Z podaćom informacijow na pjekarskich titach a małych plakatach w pjekarnjach ma so na zabawne wašnje woblubowany serbski nałožk wšěm tym wobydlerjam a hosćom Hornjeje Łužicy spřistupnić, kotřiž jón njeznaja a jim zdobom tutu parličku serbskeje kultury zbližić.
Nimo pjekarjow, kotřiž titu za ptačokwasne pječwo wužiwaja, skazaja sej ju tež hdys a hdys pěstowarnje a zakładne šule zwonka Łužicy, za swójske ptačokwasne zarjadowanja.
Grafiku "serbskeje" sroki je zhotowił Stefan Hanuš z Berlina.
fota Darius Budar, fotografowane w Selnakec pjekarni w Kamjencu