Přehlad nowinskich zdźělenkow Załožby
Zwjazk podpěra nowe wužadanja Serbow
Budyšin,
Přiražka Zwjazka za Załožbu za serbski lud drje so za lěto 2021 na 12,153 mio. eurow a tym jasnje zwyši. To bě wuslědk wčerawšeho posedźenja hospodarskeho wuběrka, kiž finalizuje hospodarski plan Zwjazka za doskónčne wobzamknjenje w Zwjazkowym sejmje. Z tym wuznaje so Zwjazk k nowym wužadanjam Załožby. Tole su nimo dalewjedźenja digitalizacije w prěnim rjedźe sylniše spěchowanje nałožowanja serbskeje rěče a načasny marketing k zesylnjenju serbskeje identity.
Direktor Załožby, Jan Budar: „Po lětach wótreho ličenja mamy nětko skónčnje móžnosć, na dawno znate přidatne potrjeby reagować a přesadźenje wotpowědnych idejow spěchować. Widźu w zwyšenju přiražki wulku dowěru do dźěła Załožby.“ Wón dźakuje so podpěraćelam w Zwjazkowym ministerstwje za nutřkowne, twar a domiznu kaž tež zapósłancam Zwjazkoweho sejma, kiž su tute zwyšenje za nas Serbow wuwojowali. Su to Klaus-Peter Schulze (CDU, městopředsyda Parlamentariskeje přirady) a Ulrich Freese (SPD, čłon hospodarskeho wuběrka).
Cyłkowna wysokosć přiražki za Załožbu za lěto 2021 je hakle jasna, hdyž so hospodarskej planaj Kraja Braniborska a Swobodneho stata Sakska wobzamknjenej. Za planowansku wěstotu za přichodne lěta wočakuje so nowe, mjeztym štwórte finančne zrěčenje mjez Zwjazkom, Swobodnym statom Sakska a Kraja Braniborska, kiž ma so w prěnim kwartalu 2021 podpisać.