Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Žarujemy wo njeboheho Křesćana Baumgärtela

Budyšin,

Čas žiwjenja bě Křesćan Baumgärtel ze serbskej kulturu a serbskim spěwom wusko zwjazany. Powołanske stacije běchu mjezdruhim w lětach 1973 do 1991 Serbski ludowy ansambl, hdźež wosebje jako solist skutkowaše abo w lětach 1991 do 1995 Domowina z. t.. Jako jeje kulturny referent spěchowaše z wulkim wosobinskim engagementom Zwjazk serbskich spěwarskich towarstwow abo dźěłaše sobu a staraše so wo wulkoprojekty kaž bě to 1. zlět serbskich chórow po přewroće (18.08.1996 w Chrósćicach) abo Mjezynarodny folklorny festiwal.

Wot lěta 1996 do 1998 bě Křesćan Baumgärtel wotrjadnik za regionalne kulturne spěchowanje w Załožbje za serbski lud a w lětach 2003 do spočatk 2007 předsyda Załožboweje rady. Hłowne temy w tutej legislaturje běchu polěpšenje zhromadneho dźěła Ludoweho nakładnistwa Domowina z nowowutworjenym Rěčnym centrumom WITAJ na polu wučbnicow, pruwowanje fuzije Serbskeho ludoweho ansambla z Němsko-Serbskim ludowym dźiwadłom a wotwobaranje hrožaceho redukowanja spěchowanskeho podźěla Zwjazka.

Na spočatku tuteje doby bu załožba ze stron Zwjazkoweho zarjadniskeho wustawa (BVA) ewaluěrowana. Wot rezultata přepytowanja měješe wotwisować wysokosć přichodneho spěchowanja Zwjazka. Tohodla tworješe pruwowanska rozprawa jedne z ćežišćow wuradźowanjow załožbowych gremijow. Dalokosahace a zdźěla njerealistiske namjety k zalutowanju móžachu so přez zasadźenje wšěch wobdźělenych redukować.

Spominamy dźakownje na njeboćičkeho - horliweho Serba a lubowarja a spěchowarja serbskeje kultury.
Njech je jemu serbska zemja lochka!