Póndźelu, 6. februara 2023, rozžohnowaše so dołholětny sobudźěłaćer Sakskeho ministerstwa za wědomosć, wuměłstwo a kulturu (SMWKT) a zamołwity za naležnosće Serbow Stanisław Brězan na wuměnk. Na swjatočnosći w Serbskim muzeju w Budyšinje dźakowaše so jemu mjez druhim Sakska statna ministerka Barbara Klepšowa za jeho dźěło a prócowanja na dobro serbskeho ludu. Zdobom přepoda wona tutón nadawk oficialnje jeho naslědnicy dr. Madlenje Malinkowej, kotraž funkciju jako zamołwita za serbske naležnosće hižo wot spočatka lěta wukonja, a wupřa jej wjele wuspěcha.

Stanisław Brězan je za čas swojeho skutkowanja předewšěm "dźěło na fundamenće wukonjał", kaž w rozmołwje ze Serbskim rozhłosom powěda. Po přewróće je so na wutworjenju Załožby za serbski lud w Drježdźanach wobdźělił. Wón je na sakskim serbskim zakonju abo tež na planach naprawow k pozbudźowanju a wožiwjenju wužiwanja serbskeje rěče sobu skutkował. Stani Brězan je załožbowe dźěło w zašłych wjace hač 30 lětach stajnje podpěrał. Za to so jemu z wutroby dźakujemy a přejemy jemu wšitko dobre!

• dźakny list załožby Stanijej Brězanej
• rozmołwu Stanija Brězana ze Serbskim rohłosom 5.02.23 móžeće sej tule naposkać: Live hósć w studiju: Stani Brězan
• w dalšim přinošku wot 6.02.23 słyšiće plany a přeća dr. Madleny Malinkec jako społnomócnjena za naležnosće Serbow: Nowa sakska serbska społnomócnjena dr. Madlena Malinkec
• artikl w Serbskich Nowinach wot 7.02.23: Stanisław Brězan staflowy stab dr. Madlenje Malinkec přepodał
• artikl w Sakskej nowinje wot 7.02.23 (němsce): Sie ist die neue Sorbenbeauftragte in Sachsens Regierung