Na wčerawšim štwórtku bě direktor Załožby za serbski lud, Jan Budar, posedźenje Załožboweje komisije zwołał, zo bychu nalětne zeńdźenje Załožboweje rady, dnja 24.05.2022, přihotowali.

Załožbowa komisija je dźěłowy wuběrk, kotryž přihotuje rozsudy za Załožbowu radu, kotraž ma je potom w jeje posedźenju wobzamknyć. Nimo toho zestaja dnjowy porjad za posedźenje Załožboweje rady.

Wotćeženja za hospodarske lěto 2020, wotličenje lońšeho hospodarskeho lěta, wužiwanje zbytnych srědkow 2021 a z toho rezultujo aktualny staw koncepcije "Serbski forum wědy na Lawskem arealu" budu jenož někotre z hesłow na agendźe zeńdźenja rady w meji.

W druhim dźělu posedźenja wěnowaše so Załožbowa komisija rozprawje direktora k změnam struktury zarjada Załožby za serbski lud, jednanskemu porjadej za přiradu projektoweho spěchowanja a rěčnej politice spěchowanych institucijow a zarjada Załožby.