Wutrobne přeprošenje na kofej a tykanc a wuměnu nazhonjenjow

Załožba za serbski lud wobhospodarja wot lěta 2022 přidatne srědki spěchowanskeho programa "Serbska rěč a kultura w strukturnej změnje". Spěchowanskej programaj rozdźělitej so na Hornju a Delnju Łužicu, potajkim na Saksku a Braniborsku.

Spěchowanski program, směrnicu a spěchowanski koncept za projekty w Swobodnym staće Sakska předstajimy Wam sobotu, dnja 6. apryla 2024 wot 15 hodź. w Serbskim domje w Budyšinje.

Po předstajenju poda knjeni Tüngerthal impulsowy přednošk a přeprošuje při kofeju a tykancu do aktiwneje wuměny k móžnosćam strukturneje změny. Tematisce orientujemy so při wuměnje na ćežišćach spěchowanskeho programa:

• zdźerženje, dalewuwiwanje a rewitalizowanje serbskeje rěče
• medijowa produkcija a rěčna technologija
• serbska rěč a kultura jako faktoraj regionalneje identity a zwjazanosće
• turistiske a hospodarske zwužiwanje serbskeho kulturneho namrěwstwa

Přeprošujemy Was wutrobnje, z dalšimi akterami serbskeho a łužiskeho žiwjenja a zhromadnje ze Załožbu za serbski lud do přichoda hladać a móžne projektowe ideje a wobsahi namakać. My jako team strukturna změna załožboweho zarjada prócujemy so, za spěchowanski program "Serbska rěč a kultura w strukturnej změnje" relewantne projekty a wizije wuwiwać a skićimy Wam zdobom móžnosć, přez rozmołwy swójske ideje a inspiracije za přichodne abo hižo wobstejace projekty namakać.

Wotběh

• 15:00 witanje
  předstajenje spěchowanskeho programa "Serbska rěč a kultura w strukturnej změnje" za projekty w Swobodnym staće Sakska
• 15:30 impulsowy přednošk knjeni Tüngerthal (čłonka přirady za mjenowany spěchowanski program)
• 16:00 wuměna při kofeju a tykancu
• 18:00 zakónčenje z předstajenjom impulsow wuměny

Wjeselimy so na mjezsobne zeznaće a čiłu wuměnu idejow.

Michaela Mošowa, Bianca Kubašec, Judit Heroldowa
zastupjerki teama strukturna změna Załožby za serbski lud