Załožba za serbski lud bě dźensa wšitkich zajimcow na zjawnu idejowu dźěłarničku k projektej "Lawski areal" a k rumnostnym kapacitam w Serbskim domje přeprosyła.

Direktor załožby Jan Budar předstaji zawodnje dotalny staw koncepcije za twarski projekt na Lawskich hrjebjach. Nimo noweho domicila za Serbski institut, Serbski kulturny archiw a centralnu biblioteku rozmysluje so wo tym, dalše serbske zarjadnišća přerjadować. Zdobom wobsteji prašenje w Serbskim domje, kak móhł so 4. poschod po wućahu MDR dale wužiwać.

Zajim za diskusiju bě wulki a diskusija sama jara šěroka a zdźěla chětro kontrowersna. Znosyło pak je so tójšto idejow, kotrež tworja dobru bazu za přichodne rozmyslowanja. Narok to nětk za załožbowy zarjad, tute rjadować a zjimać.

W dwěmaj dypkomaj běchu sej wobdźělnicy dźensnišeho wječora powšitkownje přezjedni: zo trjeba Serbski institut najnuznišo nowy archiw a magacin - za čož by Lawski areal přihódny był - a zo měła so dźensniša diskusija dale wjezć.