Na nazymske posedźenje Załožboweje rady štwórtk, dnja 08.12.2022 bě jeje předsydka Susann Šenkec do Lubina přeprosyła. Posedźenje wotmě so po dwulětnej přestawce skónčnje zaso w prezency z poskitkom digitalneho wobdźělenja.

Po rozprawje nawjedowaceje dwójki Serbskeho ludoweho ansambla wo dotalnym dźěle a k wusměrjenju ansambla, hłosowaše Załožbowa rada jednohłósnje za podlěšenje zrěčenjow z intendantom Tomašom Kreibichom-Nawku a z jednaćelku Dianu Wagnerec wo dalše pjeć lět hač do 31.07.2028.

Dale diskutowaše Załožbowa rada wo přiměrjenju mzdy sobudźěłaćerkow a sobudźěłaćerjow Ludoweho nakładnistwa Domowina wot lěta 2023. Wona powyšenju přihłosowaše a přizwoli trěbne přidatne 335 tysac eurow za přichodne lěto. "Z tym wotpowěduje załožba lětdźesatki trajacemu žadanju předewšěm serbskich nowinarskich žurnalistow, mzdu w LND niwowej druhich serbskich institucijow přiměrić.", praji direktor załožby, Jan Budar. Do zawjedźenja noweje mzdoweje struktury, kiž wotpowěduje prawidłam zastopnjowanja w zjawnej słužbje, pak dyrbi so eksterne přepruwowanje zastopnjowanjow zakónčić.

W fokusu posedźenja steješe wobzamknjenje hospodarskeho plana za lěto 2023. Jeho zestajenje bě stupacych energijowych kóštow kaž tež nadpřerězneho zwyšenja tarifow a přiwšěm wobmjezowaneho financneho ramika dla wosebite wužadanje. Njehladajo na to je plan wurunany. Sakske statne ministerstwo za wědomosć, kulturu a turizm (SMWK) ma jón nětk pruwować a schwalić.

Prěni raz w stawiznach załožby přesahuje hospodarski plan cyłkownje 30 milionow eurow. Wo to planujetaj so za spěchowanje projektow přez dwaj milionaj eurow, tak wjele kaž hišće ženje.
K nadźěłanju hospodarskeho plana a hladajo do přichoda, wuzběhny předsydka Załožboweje rady Susann Šenkec: "Smy nětko w połčasu našeho aktualneho financneho zrěčenja a to rěka za nas, zo so hižo na přichodne zrěčenje wusměrjamy."

Za strukturne srědki w Sakskej (wot 2023 do 2026) je Załožbowa rada na posedźenju spěchowanje štyrjoch dalšich projektow schwaliła. Su to:

• wudźěłanje koncepta k zwoprawdźenju serbskeho kolesowarskeho pućika, kiž ma cyłu Łužicu zwjazać, přez towarstwo Serbski kulturny turizm
• wutwarjenje digitalizacisikeho centruma při Serbskim instituće k digitalizowanju kulturneho herbstwa
• skrućenje hospodarstwa a turizma přez Krabatowe towarstwo
• spěchowanje serbskeho kulturneho a kreatiwneho hospodarstwa

Bliže wopisanje projektow podamy wam bórze na našej webstronje.

Nimo toho rozprawješe Jan Budar wo aktualnym stawje a dalšim postupowanju w twarskim projekće "Serbski forum wědy na Lawskim arealu". Wupisanje wo projektowy management je so zakónčiło. Zdobom su so přez 90 architektowe běrowy wo wobdźělenje na architektowym wubědźowanju powabili, z kotrychž so nětko 20 wobdźělnikow wuzwola. Załožbowa rada wobzamkny, zo smě so wubědźowanje kaž planowane přewjesć, tak zo móža so podłožki za wubědźowanje 22.12.2022 wupósłać. Za to trěbny rumnostny program běchu Serbski institut a Serbski muzej zhromadnje z architektami w nazymje wudźěłali. Cyłkownje trjebatej instituciji 4.800 m² wužiwanskeje přestrjenje. Za Serbski muzej woznamjenja to na přikład, zo budźe so přestrjeń za wustajeńcy podwojić a zo su tež moderne rumy za wosebite eksponaty planowane, kotrež přesahuja wysokosć jedneje etaže.
Dobyćerski naćisk architektoweho wubědźowanja ma w meji 2023 předležeć a twori zakład za dalše planowanje.

• protokol wobzamknjenjow nazymskeho posedźenja (němsce)

Druhi dźěl dnjoweho porjada so w dalšim posedźenju Załožboweje rady kónc januara 2023 wobrěči.