Załožbowa rada je na swojim wurjadnym posedźenju wutoru, dnja 13.08.2024 schwaliła, zo so nowe dźěłowe městna w serbskich institucijach, kiž su tuchwilu hač do kónca 2024 wobmjezowane, tež w lěće 2025 financuja.

Cyłkownje potrjechi to 26 dźěłowych městnow, kiž su so wot lěta 2021 wutworili.
„Tute městna zaruča dźěławosć we wobłukach, kiž maja za Serbow wysoku prioritu a kiž njejsu so do lěta 2021 falowacych resursow dla wotpowědnje wobkedźbować móhli.“, wjeseli so předsyda Załožboweje rady, Marko Kowar. Direktor załožby, Jan Budar, doda: „Je dobry signal, zo móža so městna dale wjesć. Přiwšěm pak je wobsadźenje časowje wobmjezowanych městnow hladajo na dźensniše dźěłowe wiki wulke wužadanje. Tuž je naš přichodny zaměr, městna trajnje zaručić.“

Z podlěšenych městnow su

• 7 pola Domowiny (mjez dr. za rěčneju motiwatorow za Delnju Łužicu)
• 3 w Rěčnym centrumje WITAJ (mjez dr. za docenta za hornjoserbšćinu),
• 3 w Ludowym nakładnistwje Domowina
• (mjez dr. za zesylnjenje redakcijow Serbskich Nowin a Noweho Casnika)
• 4 w Serbskim instituće (mjez dr. za monitoring serbskeho pismowstwa)
• 1 w Němsko-Serbskim ludowym dźiwadle (serbski marketing),
• 1 w Šuli za delnjoserbsku rěč a kulturu (docentka),
• 1 w Serbskim šulskim towarstwje (jednaćel) a
• 6 w DomPro w Delnjej Łužicy (Delnjoserbska kulturna akademija).

Pozadk: W lěće 2021 powyšichu wšitcy třo pjenjezydawarjo z nowym finančnym zrěčenjom k financowanju Załožby za serbski lud swoje přiražki. To zmóžni wutworjenje nowych dźěłowych městnow, kiž pak běchu najprjedy raz na tři lěta wobmjezowane. Loni w nazymje podlěši Załožbowa rada tute wobmjezowanje na kónc 2024. Poprawom předwidźane podlěšenje na kónc 2025 so tehdy wotpokaza, dokelž njebě jasne, hač so přiražka Zwjazka napjateje finančneje situacije dla we wočakowanej wysokosći schwali. Po tym, zo je Zwjazkowe knježerstwo naćisk hospodarskeho plana 2025 srjedź julija wobzamknyło, pak wěmy, zo so přiražka za załožbu njeskrótši. Tole bě wuměnjenje zastupjerjow Zwjazka w Załožbowej radźe, kiž maja runja druhim pjenjezydawarjam weto-prawo w finančnych naležnosćach, zo smědźa so městna hač do kónca 2025 dale wjesć.
Kak z městnami wot 2026 dale póńdźe, rozsudźi so na zakładźe eksterneje ewaluacije, kiž ma lětsa w nazymje Załožbowej radźe předležeć.

Runočasnje wuradźuja a jednaja pjenjezydawarjo tuchwilu wo přichodnym finančnym zrěčenju, kiž ma financowanje Załožby za serbski lud wot 2026 do 2030 zaručić.

Protokol wobzamknjenjow wurjadneho posedźenja dnja 13.08.2024 (němsce)