Wot 23. apryla do 11. julija 2021 stej Serbski muzej na Młynskej dróze a Galerija Braniborska w historiskim domskim něhdyšeho Wulkowosykoweho (Großenhainskeho) dwórnišća w Choćebuzu zarjadowanskej městnje a zdobom štwórta stacija wuměłstwoweho projekta WOBRAZY KRAJINY.

Projekt bu nastorčeny wot korutanskeho słowjenskeho wuměłca Karla Vouka a wjaza wuměłstwowe muzeje, literarne a kulturne institucije ze Słowjenskeje, Awstriskeje a Němskeje do zhromadneho dźěła.
Nastała je w tutej formje prěnja zhromadna prezentacija twórbow 26 načasnych wuměłčow a wuměłcow z wobłukow tworjace wuměłstwo, literatura a hudźba z mjenowanych třoch krajow. W swojich twórbach, na přikład w mólbach, fotografijach, filmje, lyrice a w kompozicijach, rozestajeja so wuměłče a wuměłcy z temu "krajina". Při tym njezrozumi so "krajina" jenož jako přirodna kajkosć kraja abo kónčiny, ale tež jako socialna a kulturelna konstrukcija.

Wuměłče a wuměłcy
TWORJACE WUMĚŁSTWO: Nika Autor (SI), Iris Brankačkowa/Brankatschk (DE), Jošt Franko (SI), kolektiw Irwin (SI), Michael Kruscha (DE), Marko Lipuš (AT), Zorka L-Weiss (AT), Melitta Moschik (AT), Marko Peljhan (SI), Frauke Rahr (DE), Hella Stoletzki (DE), Karl Vouk (AT)
LITERATURA: Anja Golob (SI), Lubina Hajduk-Veljkovićowa (DE), Jill-Francis "Źilka" Ketlicojc/Käthlitz, Cvetka Lipuš (AT)
HUDŹBA: kompozicije: Jan Cyž (DE), Sebastian Elikowski-Winkler (DE), Juro Mětšk (DE), Ulrich Pogoda (DE), Walburga Wałdźic/Walde (DE), Renard A. Aust (NL), interpretacija: Walburga Wałdźic/Walde (Lipsk), Heidemarie Wiesnerec/Wiesner (Berlin), Gerold Gnausch (Berlin), modernsax berlin

Zazběh do projekta bě 26. meje 2019 w Serbskim muzeju w Budyšinje. Potom hospodowachu pućowansku wuměłstwowu wustajeńcu w Muzeju za moderne a načasne wuměłstwo Koroška (KGLU) w Slovenj Gradecu a w Muzeju moderneho wuměłstwa Korutanska (MMKK) w Celovecu při Wörtherowym jězoru. Čitanja přewjedźechu so w Cankarjev domje - Kulturni i kongresni center w Lubljanje (w najwjetšej kulturnej instituciji Słowjenskeje), w muzeju Wernera Berga w Pliberku/Bleiburg a w literarnym domje Korutanskeje "Musil-Haus" w Celovecu. Koncert "TŠUGA. alles fließt. vse teče" sposrědkowa zajimowanemu připosłucharstwu w Pliberku /Bleiburg a Slovenj Gradecu zaćišć wo serbskim načasnym hudźbnym tworjenju.

K projektej je wušoł katalog (ISBN 978-3-7420-2560-9), kotryž poskića so za 15 EUR w Serbskim muzeju a w Galeriji Braniborska w Choćebuzu, w serbskimaj kulturnymaj informacijomaj LODKA w Choćebuzu a SKI w Budyšinje kaž tež přez Ludowe nakładnistwo Domowina.

Dla pandemiskeho połoženja w zwisku z koronowym wirusom a z tym zwjazanymi trěbnymi hygieniskimi a wěstotnymi naprawami njemóžetej so zazběh do projekta a wotewrjenje wustajeńcy dnja 23.04.2021 nažel na zwučene wašnje w přitomnosći wšitkich wuměłčow a wuměłcow, projektowych partnerow a přećelow zarjadowanišćow přewjesć.

Njedźiwajcy toho su zajimcy wutrobnje přeprošeni na wšitke formaty, kotrež hodźa so pod wobstejnosćemi korony zmóžnić. Na kóždy pad poskići so wirtuelne wobhladanje wustajeńcy. Čitanje a koncert budźetej so w padźe padow w alternatiwnej formje realizować a spřistupnjeć.

Dalše informacije k projektej hlej prošu internetowa strona
www.krajiny-2019-2020.info

kontakty za naprašowanja:

Christina Kliemowa
Serbski muzej/Wendisches Museum
Młynska droga/ Mühlenstraße 12
03046 Choćebuz/Cottbus
telefon: 0355 794930
info@wendisches-museum.de, www.wendisches-museum.de

Heiko Straehler-Pohl
Galerija Braniborska/Galerie Brandenburg
Přiwozna dróha/Güterzufuhrstraße 7
03046 Choćebuz/Cottbus
telefon: 0160 94987777
info@galeriebrandenburg.de, www.galeriebrandenburg.de

Anka Němcec
Załožba za serbski lud/Stiftung für das sorbische Volk
Póstowe naměsto/Postplatz 2
02625 Budyšin/Bautzen
telefon: 03591 550300
stiftung-bautzen@sorben.com, www.stiftung.sorben.com