Lawski areal: Cyłkowe financowanje zawěsćene

We wosebitym posedźenju Załožboweje rady k temje „Serbski forum wědy při Lawskim arealu“, kiž nawjedowaše předsydka Susann Šenkec, informowaše direktor załožby Jan Budar radźićelow wo tym, zo je cyłkowne financowanje twarskeho projekta nětko zawěsćene. Posedźenje rady w meji bě so dla njewočakowanych njewujasnjenych prašenjow financowanja přetorhnyło. Tež hač do posedźenja w juliju so tute rozrisać njemóžachu. Nětko je jasne, zo budźe Swobodny stat Sakska žadany podźěl 10% swójskich srědkow přewzać. Srjedź julija je wotpowědne pismo Sakskeho statneho ministerstwa za regionalne wuwiće pola załožby dóšło. Předfinancowanje nadźěłanja koncepcije, planowanja a projektoweho managementa, štož je za stajenje próstwy trěbne, bě pak dale njejasne. Próstwa wo tute spěchowanje je so spočatk septembra pola Sakskeho statneho ministerstwa za wědomosć, kulturu a turizm stajiła, z přizwolenjom liči załožba srjedź oktobra.

Nimo toho zaběrachu so radźićeljo a radźićelki z wubědźowanjom za architektne běrowy. Z nim ma so za nowotwar na Lawskim arealu najlěpše twarske rozrisanje namakać. Jako přihot za wubědźowanje so nětko hač do oktobra rumnostne potrjeby Serbskeho instituta a Serbskeho muzeja doskónčnje zestajeja, zhromadne synergije wudźěłaja a funkcionalne zwiski definuja. Po tuchwilnym planje ma dobyćerski naćisk wubědźowanja w aprylu 2023 předležeć.

Dale dósta direktor nadawk, wjednistwo projekta kaž tež wodźenje projekta eksternje wupisać, zo by dalše planowanje po wubědźowanju bjezposrědnje pokročowało. Zdobom budu so cile projekta, twarske polo a wudźěłany rumowy program w zjawnym zarjadowanju wšěch na projekće wobdźělenych institucijow a partnerow na spočatku wubědźowanja předstajić.

„Serbski forum wědy při Lawskim arealu“ (dźěłowy titul) w Budyšinje je krajna naprawa Swobodneho stata Sakskeje we wobłuku strukturneje změny we Łužiskim rewěrje Swobodneho stata Sakskeje a je po cyfrje VIII. čisło 2 RL InvKG wobzamknjeny krajny projekt. Nětko ma so próstwa wo spěchowanske srědki wotpowědnje směrnicy k inwesticiskemu zakonjej wuhlowe regiony přihotować, próstwa ma so kónc 2023 zapodać. Cyłkowne kóšty za předewzaće wučinjeja 44,4 mio. eurow, ze zakónčenjom cyłkowneho předewzaća liči so srjedź 2029.

Personalna situacija w Ludowym nakładnistwje Domowina

Dla napjateho połoženja w Ludowym nakładnistwje Domowina informowaše direktor Załožbowu radu wo stawje dalšeho schodźenka přiměrjenja mzdy za přistajenych. Wotpowědne konkretne naprawy so za hospodarski plan 2023 přihotuja. Nimo toho wozjewi prěnje wuspěchi při wobsadźenju wakantnych městnow w redakciji Serbskich Nowin. Radźićeljo a radźićelki kaž tež přitomny předsyda Parlamentariskeje přirady Marko Šiman tole witachu a wuznawachu so jasnje k třom ćišćanym medijam (Serbske Nowiny, Nowy Casnik a Rozhlad) w swojej nětčišej formje. Namołwichu direktora, jednaćela dale při wujasnjenju napjateje situacije podpěrać.

• protokol wobzamknjenjow (PDF, němsce)