W Serbskej kulturnej informaciji (SKI) w Budyšinje přepodachu so Załožbje za serbski lud pjatk, 28. januara 2022 dźewjeć nowych wałow specielnje zhotowjeneje tkaniny. Jedna so při tym wo židźany damast, kotryž so při zhotowjenju falow serbskeje ewangelskeje drasty ze wsow wokoło Wojerec wužiwa. Čłonka Wojerowskeje Domowinskeje župy „Handrij Zejler“ Anett Zahrodnikowa so jara na tutu dodawanku wjeseli. Wona je tež jedna z projektowych iniciatorkow. Hromadźe z Birgit Hančikowej, kotraž je čłonka župy, je na tutym wosebitym dnju cyle wosebiće w jeje swjedźenskej drasće do Budyšina přijěła.

Knjeni Zahrodnikowa so podźakowa pola Załožby za serbski lud za zwoprawdźenje tutoho wažneho projekta, z kotrymž so hižo 13 lět intensiwnje zaběra. K pozadkej projekta rjekny wona: „Wulke mnóstwo drastow w našim regionje je jara stare a bywa hižo lěta dołho wot nowych generacijow zdźědźene. Mjeztym su fale, kotrež dominuja pola swjedźenskich rejowanskich drastow, jara husto mócnje wobškodźene. Nowe šić njeje tak lochko, dokelž njeje potrjebowana kombinacija materiala, barbow a płatowych mustrow na wikach namakać. Swójske produkowanje tajkich tkaninow je jara drohe.“

Z podpěru regionalneje rěčnicy Domowiny Sonje Hrjehorjoweje wobroći so knjeni Zahrodnikowa na Załožbu za serbski lud. Michaela Mošowa a Nicole Zimmermannec ze Załožby stej projekt wot samoho spočatka 2021 přewodźowałoj. „ Zaměr Załožby je kulturne herbstwo zdźeržeć a spěchować. Zminjenje drastow wokoło Wojerec z wšěmi jich wosebitosćemi njeby akceptabelne było, tak zo tutón projekt rady financielnje spěchujemy. Wjeselimy so, zo zamóchmy realizaciju na zakładźe jara dobrych předdźěłow iniciatorkow tak spěšnje přesadźić“, rozkładuje knjeni Mošowa. Anett Zahrodnikowa a projektowi sobuwojowarjo su hižo w předpolu wjele časa we rozdźělnych wobstatkach mustrow, barbow a jich kombinacijow k přeslědźenju a k pytanju za móžnymi producentami inwestowali. Ze tkajernju židy Eschke z Crimmitschau su kompetentneho partnera namakali.

Firma Eschke je hižo 2000 płatno za šórcuchi zhotowiła, tak zo bě nowe sobudźěło hižo lochko dowidźeć. Torsten Bäz, nawoda židźaneje tkajernje Eschke, přepoda wosobinsce Załožbje zhotowjene tkaniny. Při tym wuzběhny: „Tež za nas tekstilnych producentow bě tutón projekt wosebite wužadanje. Kombinacija mustrow a barbow kaž tež kwalita sukna njeběchu lochko přesadźomne. Smy jara hordźi na wuslědk a radujemy so, zo pomhamy z tutej produkciju jedyn kusk serbskeje kaž tež sakskeje kultury zdźeržeć.“

Na rozdźěl wot tkaniny donětčišich šórcuchow je nowe płatno wodu a brud njepřepušćace a hodźi so k tomu wopłokać. Dohromady dźewjeć kombinacijow z třoch mustrow a třoch barbow móža sej zajimcy wot 10. februara 2022 w Serbskej kulturnej informaciji w Budyšinje a w online-wobchodźe kupić. Jedyn meter tkaniny płaći 35 euro netto, štož je 20 % zhotowjenskich wudawkow, kotrež wučinjeja 175 euro wob meter. Wob kombinaciju steja 40 metrow tkaniny k dispoziciji.