Załožbowa rada je sej na swoje posedźenje 23.05.2024 jednaćela Ludoweho nakładnistwa Domowina přeprosyła, zo bychu sej čłonojo wo situaciji w domje rozprawjeć dali. Syman Pětr Cyž předstaji swój wuwićowy koncept hač do lěta 2029. Ćežišća su crossmedialna transformacija, konsekwentna orientacija na potrjebach čitarjow wšěch starobnych skupin a zesylnjenje marketingowych aktiwitow. Dale rozprawješe wón radźićelam, čehodla njeje so tarif TV-L dotal hišće zawjedł, byrnjež so wot kónca 2022 na tym dźěła. Direktor załožby, Jan Budar, praj k tomu: „Zawjedźenje noweho tarifa je proces, kiž smy sej wšitcy jednorišo předstajili. Jako towaršnik LND so w tutym nastupanju běžnje z jednaćelom wuměnjam a wjeselu so, zo móžemy bórze hóčku za tutym wulkim nadawkom sadźić.“. Zo njebychu hłubokosahace změny, kiž su so w LND zahajili, worožene byli, wobzamkny Załožbowa rada, zrěčenje z jednaćelom wo dalše pjeć lět podlěšić. Knjez Cyž je wot 01.06.2020 jednaćel LND, tuchwilne zrěčenje skónči 31.05.2025.

Na posedźenju informowaše direktor załožby čłonow gremija wo aktualnym stawje planowanjow „Serbskeho foruma wědy na Lawskim arealu“. Hladajo na opciju z BWB (Bautzener Wohnungsbaugesellschaft), kiž w juniju 2024 wotběži, přizwoli rada nakupej štyrjoch ležownosćow. Z tym su wšě za twar trěbne ležownosće zawěsćene.

Dale wuradźowachu radźićeljo wo wobmjezowanjach wot lěta 2021 wutworjenych městnow, kiž hodźachu so na zakładźe zwyšenja přiražkow ze 4. finančnym zrěčenjom (2021 do 2025) financować. W nazymje 2023 je rada wobmjezowanja hižo na 31.12.2024 podlěšiła, nětko bě dalše podlěšenje na 31.12.2025 předwidźane. Njewěste finančne połoženje Zwjazka za lěto 2025 pak pohnu gremij k přesunjenju rozsuda, ručež je přiražka Zwjazka za 2025 jasna. „Zo bychmy nošerjam městnow a z tym tež wotpowědnym přistajenym wěstotu dalšeho financowanja dali, dźěłamy na wobzamknjenju w ramiku wosebiteho posedźenja w 3. kwartalu 2024. Wšo druhe by było riskantne za nowe dźěłowe wobłuki, kiž z pomocu nowych městnow zaruča.“ zjima předsyda Załožboweje rady, Marko Kowar.

W zwisku z nowowobsadźenjom zastupjerjow Serbow w Załožbowej radźe namjetowaše so na prěnim posedźenju w nowej zestawje w meji 2023, wobchad ze zajatosću přepruwować a po potrjebje předźěłać. Tohodla so rjadowanja, kiž so hižo na posedźenju 28.11.2023 nałožowachu, po prawniskim pruwowanju nětko do jednanskeho porjada zapisachu a schwalichu.

Knjeni Kerstin Kosakowa, społnomócnjena za serbske naležnosće wokrjesa Sprjewja-Nysa, Baršć, wobdźěli so poslednjemu razej za posedźenju Załožboweje rady, dokelž poda so na wuměnk. Za jeje sobudźěło w třoch legislaturach jako zastupjerka Braniborskeho wokrjesneho sejmika a Braniborskeho sejmika městow a gmejnow podźakowa so předsyda Załožboweje rady, Marko Kowar, wutrobnje.

Protokol wobzamknjenjow Załožboweje rady z dnja 23.05.2024 (němsce)