Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Twarske naprawy na ležownosći SLA zakónčene

Budyšin,

Dypkownje k swjedźenskemu kóncej tydźenja składnostnje 70-lětneho wobstaća Serbskeho ludoweho ansambla su firmy poslednje twarske naprawy na južnym trakće hrajnišća w Budyšinje zakónčili.

Na ležownosći je załožba jako mějićelka twarskeho kompleksa w lětach 2020 do 2022 nowy baletny trakt natwarić a zachod na dworje přetwarić dała. To bě trěbne, dokelž dyrbješe so južny trakt nuznje saněrować a nimo toho dotalne rumnosće hižo modernym žadanjam njewotpowědowachu abo cyle pobrachowachu. Za nowotwar baletneho trakta dyrbjachu so stara baletna žurla a garaži spotorhać. Nětko su w nowotwarje nimo probowych rumnosćow za balet a chór tež dalše funkcionalne rumnosće zaměstnjene. Škleńčana fasada na dwórskej stronje twarjenja skići zajimcam móžnosć, wuměłcam za čas probow přez ramjo hladać.

Přetwara, přerjadowanja a změnjeneho wužiwanja wobstejacych rumnosćow dla, su wuměłski, wopytowarski a zarjadniski wobłuk w ansamblu nětko jasnje wot so dźělene. Zachod je so powjetšił a skići nětko dosć městna za witanje wopytowarjow na zarjadowanja, kasu, garderobu atd. Nimo toho su wšitke rumnosće, kotrež wopytowarjo wužiwaja, bjez barjerow přistupne.

W zwisku z twarskimi naprawami je so tež dwór saněrował a znowa plestrował.

Za čas přetwara bě SLA do přechodneho hrajnišća, do něhdyšeje dźiwadłoweje dźěłarnje na Wjelećanskej dróze w Budyšinje ćahnył. W lěću 2022 twarske naprawy w hrajnišću w dalokej měrje zakónčichu, tak zo móžeše so ansambl w septembru nawróćić a nowu hrajnu dobu pod dobrymi wuměnjenjemi startować.

Projekt so financuje so we wysokosći 2,275 mio. EUR ze sakskich dawkowych srědkow na zakładźe etata, kotryž bě Sakski krajny sejm wobzamknył a přidatnje z nahladneho dźěla, kotryž zwjedźe Sakske statne ministerstwo za wědomosć, kulturu a turizm (SMWK) z pjenjez ze swójstwa stronow a masowych organizacijow NDR.
Z cyłkowneho wolumena za twarsku naprawu - nimale 3 mio EUR - přewozmje Załožba za serbski lud sama 590 tysac EUR.

Za saněrowanje dwora přizwoli Kulturny rum Hornja Łužica-Delnja Šleska załožbje we wobłuku projektoweho spěchowanja přidatnu podpěru we wysokosći 49,6 tysac EUR. Swójski podźěl załožby wučini hišće raz 49,6 tysac EUR.

Na swjedźenskim kóncu tydźenja składnostnje 70-lětneho wobstaća Serbskeho ludoweho ansambla wot 7. hač do 9. oktobra wotměłaja so wšelake zarjadowanja. Njedźelu na dnju wotewrjenych duri su wšitcy zajimcy wutrobnje přeprošeni sej nowe stare hrajnišćo ansambla wobhladać.

Program swjedźenskeho kónca tydźenja namakaće na webstronje Serbskeho ludoweho ansambla.