Štwórte financne zrěčenje za Załožbu za serbski lud podpisachu wutoru, 20. julija 2021, zwjazkowy minister za nutřkowne, twarstwo a domiznu, Horst Seehofer, ministerski prezident Swobodneho stata Sakska, Michael Kretschmer, a ministerski prezident Braniborskeje, dr. Dietmar Woidke. Zarjadowanje wotmě so digitalnje.

Hižo na kóncu lěta 2018 je załožba internje zahajiła jednanja za nowe financne zrěčenje za dobu 2021-2025. Dźakowano njesprócniwemu dźěłu na knježerstwowej a parlamentariskej runinje je so poradźiło, přiražku za dobu wot lěta 2021 zwyšić. Wšitcy třo pjenjezydawarjo, Zwjazk, Sakska a Braniborska, wobzamknychu to w swojich hospodarskich planach za lěto 2021 resp. 2021/2022.

Ze Štwórtym financnym zrěčenjom wobsteji nětk wěstota za planowanje a cyłkowna suma spěchowanja pjenjezydawarjow zwyši so wot tuchwilnje 18,6 milionow eurow lětnje na 23,92 milionow eurow. Wot tutych dawa Zwjazk lětnje 11,96 milionow eurow, 7,97 milionow eurow Swobodny kraj Sakska a 3,99 milionow eurow Braniborska.

Z krótkim dźakowanskim widejom připóznachu zastupjerjo załožby, Domowiny a Sakskeho krajneho sejma podpisanje zrěčenja.

Susann Šenkec, předsydka Załožboweje rady Załožby za serbski lud: "Dźensa podpisane Štwórte zrěčenje financowanja Załožby za serbski lud je w 30. lěće jeje wobstaća jasne wuznaće pjenjezydawarjow. Za to słuša Zwjazkej, Swobodnemu krajej Sakska a Braniborskej naš wurazny dźak.

Dožiwjamy historiski wokomik, kotryž nas a přichodne generacije, tež hladajo na strukturnu změnu we Łužicy, wužada, ale nam zdobom nowe móžnosće skići. Tomu chcemy wotpowědować."

Jan Budar, direktor Załožby za serbski lud: "Stopnjowanje přiražkow njezaruči jenož dotalne dźěło załožby a spěchowanych serbskich institucijow, ale tež zwoprawdźenje nowych naprawow. Zwyšenje hódnoću jako znamjo hłubokeje dowěry do našeho dźěła. Zo mamy nětko planowansku wěstotu a móžemy wutworić runočasnje nowe pola skutkowanja, je mi a wšitkim sobudźěłaćerkam a sobudźěłaćerjam wulka motiwacija za wužadanja, kotrež před nami leža."

Marko Šiman, předsyda Parlamentariskeje přirady Załožby za serbski lud: "Za zwyšenje financielneje podpěry za Załožbu za serbski lud mamy so dźakować njesprócniwemu zasadźenju zastupjerjow zwjazkoweho knježerstwa, zapósłancam Němskeho zwjazkoweho sejma, Swobodneho stata Sakska a Braniborskeje a čłonkam a čłonam Parlamentariskeje přirady. To je přeswědčace wuznaće wuznamej serbskeje rěče a kultury kaž tež jasny signal za přichod Serbow."

Dawid Statnik, předsyda Domowiny: "Z dźensnišim podpisanjom zrěčenja wostanu Zwjazk, Braniborska a Sakska spušćomni partnerjo serbskeho ludu. Knježerstwa a parlamenty su so w zašłych lětach wopokazali jako swětłownje načasneje politiki we wobchadźe ze serbskim ludom. Runočasnje so wšitkim rjap skrući, kotřiž so za přichod Serbow zasadźuja."

dźakowanske widejo Serbow

nownska zdźělenka BMI, 20.07.2021