Přehlad nowinskich zdźělenkow Załožby
Što je rěč bjez literatury?
Budyšin,
Přeprošujemy na 1. koło literarnych dźěłarničkow, kotrež nawjedujetaj wot lěta 2019 Lubina a Dušan Hajduk-Veljković. Dźěłarnički wotměja so dwójce wob lěto a změja kóžde lěto wěste ćežišćo.
Prěnja cyłodnjowska dźěłarnička z temu krótka proza budźe sobotu, 23. měrca w Budyšinje.
Přizjewić móža so wšitcy zajimcy, kotřiž chcedźa rady serbsku literaturu wobohaćeć a hišće swójsku serbsku knihu wudali njejsu. Zapodajće dwě swójskej twórbje na mejlowu adresu dzelarnicki@lubina-hajdukowa.de. Jedna twórba smě hižo wozjewjena abo na literarnym wubědźowanju zapodata być. Wažne je, zo ma dobru rěčnu a wobsahowu kwalitu. Tekst druheje twórby je zdobom tekst, kiž so w běhu lěta wobdźěłuje. Ma to być powědančko (3-10 normowych stronow) z dobrym rěčnym a wobsahowym niwowom.
Přizjewće so hač do 31. januara 2019 a budźće pódla, hdyž so nowa serbska literatura pječe!
Literarne dźěłarnički wuhotuje Załožba za serbski lud z podpěru Ludoweho nakładnistwa Domowina tzwr a Zwjazka serbskich wuměłcow z. t.
Kontakt za naprašowanja:
John Petrik
telefon: 03591 550-312
j.petrick-stiftung@sorben.com