Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Stipendiataj załožby wopytaštaj serbske institucije w Budyšinje a Choćebuzu

Budyšin a Choćebuz,

Wot 1996 spožča Załožba za serbski lud semesterske stipendije za dźělny studij sorabistiki na Lipšćanskej uniwersiće studentam z wuchodoeuropskeho wukraja, dotal hižo 59 króć. Tuchwilnaj stipendiataj Karolina Babczuk, studentka slawistiki z Pólskeje, a Kryštof Peršin, doktorand z Čěskeje, wopytaštaj minjeny tydźeń Łužicu, zo byštaj wšelake serbske institucije bliže zeznałoj.

Štwórtk wjedźeše jeju puć do Budyšina. Zhromadnje ze Stanijom Wowčerjom, zamołwitym za stipendiatow pola załožby, běchu najprjedy pola Serbskeho instituta a Rěčneho centruma WITAJ z hosćom. Po wuměnje z direktorom załožby Janom Budarjom a jeho zastupjerku Michaelu Mošowej slědowaše wopyt pola kolegow Domowiny. Po tym, zo wobhladachu sej tež nowe twarjenje Serbskeho ludoweho ansambla, móžeštaj stipendiataj k zakónčenju dnja hišće do Ludoweho nakładnistwa Domowina a do Smolerjec kniharnje pohladnyć.

Pjatk zahaji so za studentaj z přednoškom dr. Annett Brězanec w delnjoserbskim internaće w Choćebuzu we zwisku z kubłanskim dnjom Šule za delnjoserbsku rěč a kulturu. Po tym móžeštaj wobaj w Serbskim domje dohlad do dźěła delnjoserbskeho wobłuka instituta, Domowiny a wosebje Zorja (imersiwny rěčny projekt za dorosćenych, www.zorja.org), kaž tež dźěła serbskeho programa rbb dóstać. Ke kóncej kubłanskeje jězby do Delneje Łužicy wopytachu z kolegomaj załožby Choćebuske nutřkowne město a Serbski muzej.

Sobotu wobdźělištaj so studentaj na dźěłarničce wóskowanja jejkow w SKI w Budyšinje a wopytaštaj předstajenje serbskeje dźiwadłoweje hry “Hrěšna wjes abo Zabyty čert” Němsko-Serbskeho ludoweho dźiwadła.

Załožba za serbski lud dźakuje so wšitkim institucijam a jich zastupjerjam za čas, kotryž su sej za stipendiatow wzali.