Na posedźenju Parlamentariskeje přirady Załožby za serbski lud dnja 11.09.2023 w Podstupimje su so čłonki a čłonojo na wozjewjenje slědowaceho stejišća dojednali:

Stejišćo Parlamentariskeje přirady Załožby za serbski lud za měrliwu zhromadnosć wobydlerjow we Łužicy z tolerancu a respektom

Parlamentariska přirada Załožby za serbski lud wotpokazuje kóždužkuli formu ekstremizma. Prawicarske nadpady na wosoby w šuli w braniborskich Bórkowach (Błóta), kiž běchu z wosobinskim poniženjom zwjazane, najwótrišo zasudźa. Wosebje zjawne přesćěhowanje wučerjow, kotrajž staj zjawnosć wo podawkach informowałoj, njejsu w našej demokratiji akceptabelne. Šula ma być městno wuknjenja, respekta a mjezsobneje česćownosće. Hida a namóc njesmětej so w našim kraju zaměstnić.

Nadawk Załožby za serbski lud wostanje tež w přichodźe mjez druhim spěchowanje měrliweje zhromadnosće we Łužicy a z tym wužiwanje šansow demokratije. Parlamentariskej přiradźe je wažne, wuwiće rěče a kultury Serbow dale podpěrać a tež přez mnohostronsku kulturu zrozumjenju mjez Serbami a Němcami přisporjeć. Zakład za to tworja respekt, česćownosć a toleranca na šulach a w towaršnosći.

Dalše temy posedźenja běchu přihoty na pjate financne zrěčenje za dobu 2026-2030 a přiměrjenje mzdow w LND. Čitajće wjace wo posedźenju Parlamentariskeje přirady tež w Serbskich nowinach: "Přirada załožby chce pospěšić" (artikl wot 12.09.2023.

Parlamentariska přirada je organ Załožby za serbski lud, kiž poradźuje najwyši a rozsudźacy organ, Załožbowu radu. Jej přisłušeja zastupjerjej Zwjazkoweho sejma, zastupjerjej Sakskeho krajneho sejma a zastupjerjej Krajneho sejma Braniborskeje. Předsyda přirady je wot 1995 Marko Šiman (zapósłanc Sakskeho krajneho sejma).