Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Społnomócnjeny Fabritius so na posedźeju parlamentariskeje přirady Załožby za serbski lud wobdźělił

Społnomócnjeny zwjazkoweho knježerstwa za prašenja wusydlencow a narodne mjeńšiny, prof. dr. Bernd Fabritius, je 7. junija 2021 na posedźenju Parlamentariskeje přirady Załožby za serbski lud pod nawodom čłona Sakskeho krajneho sejma Marka Šimana wo financowanju załožby w přichodźe a spěchowanju strukturneje změny we Łužicy rěčał.

W swojej rozprawje wuzběhny Fabritius wuznam noweho zrěčenja k zhromadnemu financowanju Załožby za serbski lud za dobu 2021 do 2025. Zrěčenje je so mjez Zwjazkom, Swobodnym statom Sakska a Krajom Braniborska wujednało a ma so bórze podpisać.

Zrěčenje zawěsći załožbje hač do 2025 załožbje cyłkowne přiražki we wysokosći 23,9 mio eurow wob lěto. Přidatnje k w zrěčenju wujednanym přiražkam staji Zwjazkowy sejm załožbje 195.000 euro za projekty digitalizacije k dispoziciji.

Předsyda Parlamentariskje přirady Marko Šiman praji k tomu: "Jako społnomócnjeny Zwjazka je so knjez prof. Fabritius zhromadnje ze swojimi kolegami ze Zwjazkoweho ministerstwa za nutřkowne jara za serbske naležnosće zasadźił. Historiske zwyšenje přiražkow za Załožbu za serbski lud zmóžnja Serbam aktiwity na polu digitalizacije kaž tež wobchowanja a ponowjenja rěče zesylnić. Za to jemu wulki dźak!"

Za serbski lud je esencielnje, zo su Załožba za serbski lud a wšitke wot njeje spěchowane serbske institucije za přichod financielnje w dosahacej měrje wuhotowane, zo móža nadawki, kiž su k zdźerženju serbskeje rěče a kultury trěbne, derje spjelnić. Fabritius wuwjedowaše: "Za wjazanje młodeje generacije na serbsku rěč je wažne wuměnjeje, zo móže so serbšćina tež w elektroniskich medijach wobšěrnje wužiwać."

Jan Budar, direktor Załožby za serbski lud, komentuje: "Běch překwapjeny, kak derje knjez prof. Fabritius nutřkowny wid narodneje mjeńšiny znaje a z tuteje perspektiwy zamó hódnotne impulsy dać, n.př., kak wažne staj za Serbow nimo digitalizacije tež wobłukaj zetkawanje a wuměna mjez generacijami za zdźerženje rěče a identity."

"Zamołwitosć za dalše wuwiće serbskeho ludu leži nětko w rukomaj našeje generacije. Sym dźakowna za dobre wuměnjenja, za kotrež je so knjez prof. Fabritius rozsudnje zasadźił. Z wulkim wjeselom wočakuju bórzomne podpisanje finančneho zrěčenja." podšmórnje předsydka załožboweje rady Załožby za serbski lud Susan Šenkec.