Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Směrnicy załožby k spěchowanskemu programej “Serbska rěč a kultura w času strukturneje změny” schwalili

Směrnicy Załožby za serbski lud k spěchowanskemu programej "Serbska rěč a kultura w času strukturneje změny" za projekty w Sakskej a Braniborskej buštej pruwowanej a w pruwowanej wersiji na wurjadnym posedźenju Załožboweje rady schwalenej. Posedźenje bě předsydka Załožboweje rady, Susann Šenkec, wčera, 1. měrca 2022, zwołała.

Směrnicy stej tuž wot 02.03.2022 płaćiwej a na webstronje załožby wozjewjenej. Tež wotpowědne formulary za stajenje próstwow steja tule k dispoziciji. Próstwy za tute lěto móža so hišće hač do 31.03.2022 w załožbowym zarjedźe zapodać.

Dla nachwilneho hodpodarjenje Zwjazka 2022 njeje tuchwilu hišće jasne, hdy trěbne spěchowanske srědki k dispoziciji steja. Zarjad załožby wuchadźa z toho, zo budźe to wot 1. julija 2022. Krótkodobneho wozjewjenja směrnicow dla liči so z tym, zo zapodaja so nětko prěnjotnje koncepcionelne předewzaća. Za klětuše projekty maja zapodarjo próstwow do 30. septembra 2022 chwile.

Dale wobzamkny Załožbowa rada strukturelnu zestawu přirady k spěchowanskemu programej. Mjena dyrbja so hišće w měrcu přez wobběhowy proces wobkrućić.

2021 wobzamkny Zwjazkowy sejm w ramiku Zakonja za strukturnu změnu, zo su serbske naležnosći ze strukturnych srědkow spěchujomne. Srědki wotpowědnje § 17 čo. 31 InvestKG maja so přez Załožbu za serbski lud wobhospodarić. Za Łužiski rewěr w Sakskej steja hač do 2038 lětnje 2,5 mio. eurow k dispoziciji, w kraju Braniborska su hač do 2031 cyłkownje 19 mio. eurow etatizowanych.

Link k spěchowanskimaj směrnicomaj "Serbska rěč a kultura w strukturnej změnje"

W dalšim dypku dnjoweho porjada zaběraše so rada ze stawom koncepcije "Serbski forum wědy při Lawskim arealu". W planowanym twarskim předewzaću w centrje města Budyšin maja so Serbski institut ze Serbskim kulturnym archiwom a Serbskej centralnej biblioteku a Serbski muzej zaměstnić. Projekt spěchuje so ze strukturnych srědkow we wysokosći 44,5 mio. eurow.

Załožbowa rada wobzamkny, so budźe załožba projektowy nošer tuteje krajneje naprawy Swobodneho stata Sakska. Rada wuńdźe wot toho, zo poskići Sakska w kóždej fazy planowanja a přewjedźenja projekta trěbnu podpěru.

Dale rada wobzamkny, zo so prawidłownje wo projekće a měznikach informuje. Wo naslědnych projektowych fazach ma so seperatnje wothłosować.

"Jednohłósne wobzamknjenje smy sej z wulkej prócu nadźěłali. Wšako je předewzaće nadměru wuznamne za Serbow, město a wokrjes Budyšin, Łužicu a Saksku. Załožbowa rada je nětko přewzała zamołwitosć", předsydka rady Załožby za serbski lud Susann Šenkec zijma. Zdobom so nad tym wjeseli, zo je so financowanje foruma při Lawskim arealu ze strukturnych srědkow Sakskeje poradźiło.

Jan Budar, direktor załožby, wudospołni: "Twarske předewzaće staji nas před najwobšěrniše wužadanje w 30-lětnych stawiznach skutkowanja załožby. Podźakujemy so za připrajenu podpěru Swobodneho stata Sakska, bjez kotrejež njeby so projekt zwoprawdźić hodźał."

Za zwoprawdźenje wulkoprojekta je personelne zesylnjenje załožboweho zarjada trěbne. Městno projektoweho nawodnistwa je mjeztym hižo wupisane.

Link k wupisanju dźěłoweho městna projektneho nawoda