Za wubědźowanje wo realizaciju „Serbskeho foruma wědy na Lawskim arealu“ su so 108 architektowych běrowow hłownje z Němskeje ale tež z europskeho wukraja požadali. Přez wulosowanje zwěsćichu ze wšěch požadarjow 20 wobdźělnikow, z kotrychž 18 wubědźowanske dźěło zapoda.

Nadawk wubědźowanja bě, namakać za Lawski areal so hodźacu koncept za městno, na kotrymž Serbski institut a Serbski muzej w Budyšinje zhromadnje we wotewrjenej atmosferje wšitkim zajimcam serbsku kulturu zbližitej. Zdobom měli so z planowanjom wobstejace rumnostne naroki rjadować a za wobě instituciji načasne dźěłowe wuměnjenja a wustajenišća wutworić.

Wosebita ćeža při tym bě, zo měło so zhromadne skutkowanje na dwěmaj ze sobu njezwjazanymaj ležownosćomaj na Lawskim arealu zwoprawdźić. Tam wobstejace pomnikoškitne twarjenja mějachu so do planowanja zapřijeć.

Štwórtk, 01. junija 2023 schadźowaše so mytowanska jury w Serbskim domje w Budyšinje pod nawodom prof. Axela Oestreicha, nazhoniteho architekta z Berlina. Nimo štyrjoch nazhonitych architektow słušachu k jury tež zastupjerjo załožby, Serbskeho instituta a Serbskeho muzeja. Zapodate buchu nimo projektowych skicow a planow tež mały 3D-model.

Jury zaběraše so intensiwnje z 18 naćiskami, kiž su jara zajimawe a předpisane naroki jara wšelakorje rozrisaja. Po dołhim dnju móžachu so wšitcy wobdźěleni na dobyćerski naćisk dojednać, z kotrymž móža so wšitcy identifikować a kotryž funkcionelne žadanja serbskeju institucijow najlěpje spjelnja.

Dźěło Mnichowskich architektow bogevischs buero přeswědči předewšěm tohodla, dokelž su w swojim naćisku pomnikoškitane twarjenje při Lawskich hrjebjach zdźerželi, přitwar zawrěje dźěru hač k zapadnej ležownostnej hranicy. Předwidźany twar zarjaduje so do měšćansko-twarskeho ramika, pokazuje so přiwšěm načasnje, cituje z wobłukojtym přechodom typiski motiw Budyskeho stareho města a twori tak po měnjenju jury hódnu adresu za Serbski forum wědy. Naćisk funguje nětko kaž tež, jeli měła so susodna ležownosć při Lawskich hrjebjach wobtwarić. Nutřkowna organizacija přeswědči jury runje tak kaž kwalita nastatych nutřkownych dworow. Jasna struktura podrysow hodźi so derje za wariabelne wustajenske koncepty muzeja.

Běrow Bez+Kock Architekten ze Stuttgarta wuznamjeni so z 2. městnom, Schulz + Schulz Architekten z Lipska z 3. městnom.

Dalše tři naćiski běrowow Holodeck architects z Wiena, VON M Gmbh ze Stuttgarta a AFF Architekten z Berlina so z připóznaćom česćuja.

Wšitke zapodate naćiski su hač do 3. julija w Serbskim domje w Budyšinje wustajene a móža so dźěłań dźeń wot 9:00 hodź. do 16:30 hodź. wobhladać. Wšitcy zajimcy su wutrobnje přeprošeni.

Dobyćerski naćisk twori zakład za wšitke dalše planowanske kročele, kiž maja so hač do prěnjeho kwartala 2024 zakónčić. Po tym móže załožba doskónčnu próstwu wo spěchowanje zapodać. Wotwisnje wot přizwolenja planuje załožba tuchwilu z tym, zo móža z twarskimi dźěłami, rozrjadowanymi do dweju twarskeju wotrězkow, w druhim kwartalu 2025 započeć. Jeli so wšo radźi, je zaćah dweju institucijow kónc 2029 móžny. Twarske předewzaće je krajna naprawa Swobodneho stata Sakskeje, kotraž dóstanje za to 44,5 Mio EUR ze strukturnych srědkow po InvKG. Twarski knjez je Załožba za serbski lud.

Přinoški k temje w dalšich medijach:

• Serbski forum wědy: 18 naćiskow a jedyn dobyćer (Serbske nowiny, 09.06.2023)
• Dobyćerski naćisk Mnichowscy architekća zdźěłali (Serbske nowiny, 05.06.2023)
• Dobyćerski naćisk „Serbski forum wědy na Lawskim arealu" předstajeny (MDR Serbski rozhłós, 06.06.2023)
• So soll das Sorbische Wissensforum in Bautzen aussehen (Sächsische Zeitung, 05.06.2023)
• So soll das Lauenareal künftig aussehen (Oberlausitzer Kurrier, 10.06.2023)
• Bayern bauen in Bautzen (Radio Lausitz, 05.06.2023)