Přehlad nowinskich zdźělenkow Załožby
Serbskorěčna klanka “Lingufino” so předstajiła
Smochćicy,
wuknjenska klanka Lingufino
Na fachowej konferency Serbskeho šulskeho towarstwa a Domowiny štwórtk, 13. oktobra 2022 w Smochćicach předstaji so k prěnjemu razej serbskorěčna klanka “Lingufino”. Pleńčatko je wuknjenska hrajka, kiž spóznawa rěč a na nju reaguje, tak zo móža so dźěći z njej serbsce rozmołwjeć a spěwać a so při tym w serbšćinje wukmanić.
Nimo stawiznow, dyrdomdejow, serbskich bajkow a dźěćacych spěwow wobsahuje repertoire klanki tež hódančka a paćerje, a skići samo přewodźenje při zuby rjedźenju. Lingufino předleži w dwejomaj wersijomaj: za maćernorěčnych a za hornjoserbsce wuknjacych.
Wuwiwarjo Drježdźanskeje firmy Linguwerk GmbH předstajichu publikumej pozadki technologije a darichu załožbje naměstnje 50 serbskich klankow. Załožba přepoda dźěl klankow přitomnym kubłanišćam, zo bychu dźěći klanku nětko wuspytali a wužiwali. W běhu lěta chce załožba přez ewaluaciju zwěsćić, kak so hrajka wot dźěći přiwza a kak ju wužiwaja. Jeli je wuslědk pozitiwny, chce załožba zhromadnje z Linguwerk dalše wobsahi wuwić.
Serbski Lingufino nasta jako pilotowy projekt we wobłuku slědźenja k mašinelnemu spóznawanju serbskeje rěče. W oktobrje 2021 podpisa so wotpowědne zrěčenje Załožby za serbski lud z firmu Linguwerk GmbH. Jednaćel firmy dr.-ing. Rico Petrick so tež z wosobinskeho zajima rady na projekće wobdźěli, wšako pochadźa z Wochozy a ma serbske korjenje. Michał Cyž podpěraše při wuwiću stawizny a přewza awdijowe nahrawanja w medijo-pedagogiskim studiju. Dźiwadźelnica a spěwarka Anna-Maria Bretschneiderec dari Lingufinej serbski hłós. Při lektorizowanju podpěraše Božena Braumannowa a při stawiznach wokoło zuby rjedźenja zubna lěkarka Katka Baierowa.
Serbski Lingufino njeje tuchwilu na předań, móže pak so w serbskich kubłanišćach a w Serbskej kulturnej informaciji (SKI) wuspytać.
Dalše informacije: