Filmowy festiwal Choćebuz rozžohnuje po 20 wupěšnych lětach “Lausitzer FilmSchau - Łužyska filmowa pśeglědka - Łužiska filmowa přehladka”. Załožba za serbski lud je partnerka 33. wudaća festiwala a iniciěruje  pod hesłom "Heimat|Domownja|Domizna" filmowu sekciju. W tutej sekciji so twórby filmowcow z Hornjeje a Delnjeje Łužicy bjezposrědnje do jednanja festiwala integruja. Pod mjenom „Dołha nóc krótkich Łužičanow – Dołha nóc krótkich łužiskich filmow“ (Lange Nacht der kurzen Lausitzer) maja swójske městno w programje.

„Po 20 lětach je na času, zo Łužiske filmowstwo na nowy schodźenk pozběhnjemy a dale na jeho profesionalizaciji dźěłamy. Naša ideja, zo wuworimy z Łužiskej filmowej přehladku młodym Łužičankam a Łužičanam powabk, zo so tež praktisce z filmowanjom zaběraja, je so wopokazała jako wuspěšna a ze symja je mjeztym wurostła nahladna rostlina. Z toho slědujo smy tež syć Łužycafilm   załožili a etablěrowali “, praji Andreas Stein, jednaćel filmoweho festiwala Choćebuz.

Přinoški k dołhej nocy krótkich łužiskich filmow konkuruja wo myto Załožby za serbski lud. Z tutym mytom we wysokosći 1.000 eurow wuznamjeni njewotwisna jury tón film, kotryž nawjazuje na temy serbskeho ludu a kotryž zapřija serbsku rěč. Mytowanje zarjaduje so lětsa prěni raz do wobłuka spožčenja festiwalneho myta, sobotu wječor, 11.11.2023.

„Die lange Nacht der kurzen Lausitzer - Dłujku noc krotkich łužyskich filmow – Dołhu nóc krótkich łužiskich filmow“  dožiwja wopytowarjo štwórtk wječor, 9.11.2023 wot 19 hodź. w Choćebuskim kinje „Weltspiegel“. Sobotu a njedźelu so přinoški wospjetuja.

Hižo film swjatočneho zahajenskeho zarjadowanja 33. filmoweho festiwala Choćebuz, 07.11.2023 w Choćebuskim Statnym dźiwadle, je serbski. Wuměłski kino-dokumentarny film „Bei uns heißt sie Hanka / Pla nas gronje jej Hanka / Pola nas rěka wona Hanka“ wot Grit Lemkoweje je Załožba za serbski lud spěchowała. Wospjetowanje předstajenja filma budźe njedźelu, 12.11.2023 w 12 hodź. w Choćebuskej měšćanskej hali.

Program sekcije „Heimat|Domownja |Domizna“ wěnuje so pod hesłom „Wendisches aus der Niederlausitz – Donald Saischowa“ nimo toho tworjenju łužiskeho filmowca Donalda Saischowa.

Indigene filmowanje Sámi z Norwegskeje pokaza so w filmje „Let the river flow“ dnja 07.11.2023 w 22 hodź. w hornim kinje kaž tež 12.11.2023 w 15 hodź. w kinje Weltspiegel. Film tematizuje tak mjenowany alta-konflikt a jeho sćěhi za sebjewědomje Sámi.

W awgusće wotměwaše so wot Sami-filmoweho instituta w Norwegskej zarjadowana filmowa konferenca. Na 17. zeńdźenju serbsko-němskeje filmoweje syće Łužycafilm wot 10. – 11.11.2023 w Choćebuzu, kotrež Załožba za serbski lud sobu organizuje, budu so rozprawa nazhonjenjow wopyta tuteje konferency a prašenje kotre nazhonjenja móžemy na serbski film přenjesć, wobjednawać.

Za wjelelětnu podpěru serbskeho filmowstwa spožčitaj Filmowy festiwal Choćebuz a Załožba za serbski lud zhromadnje w nadawku Serbsko- němskeje syće filmow Łužycafilm na zarjadowanju 11.11.2023 wot 15 hodź. w Gladhouse něhdyšemu redaktorej filmoweho magacina rbb „Łužyca“ Hellmuth Henneberg we wobłuku sekcije „Heimat|Domownja|Domizna“ čestne myto.

Dospołny festiwalny program kaž tež informacije k předani tiketow su na oficialnej webstronje filmoweho festiwala Choćebuz wozjewjene.