W přihotowanskej klawsurje za wosebite posedźenje Załožboweje rady 1. měrca, zaběrachu so serbscy radźićeljo minjenu sobotu, 22. januara 2022 nimo wobhospodarjenja srědkow strukturneje změny tež z projektom „Serbski forum wědy“ na Lawskim arealu w Budyšinje. W tutym zwisku wobhladachu sej na městnje Staru póštownju na Hošic hasy. Twarjenje steji na jednej ze štyrjoch ležownosćow, kiž su za planowany wulkoprojekt trěbne. Loni w decembrje je Załožba za serbski lud tutu a dalšu ležownosć wot města Budyšina za 83.000€ kupiła.

Zašłu póndźelu, 17. januara, stej so ležownosći nětko załožbje přepodałoj. Zapis do ležownostneje knihi sćěhuje. Dalšej trěbnej ležownosći matej so hišće wot Budyskeje bydlenskeje towaršnosće (BWB) kupić. 

Tuchwilu dźěła załožba na přihotach za planowanje twara. W přichodnym kroku maja so w Załožbowej radźe k tomu wšelake wobzamknjenja wothłosować. Wotewrjeny je na př. hišće politiski rozsud, zo přewozmje Sakska zamołwitosć za twar objekta.