Zastupjerjo politiki, kubłanja a serbskich institucijow dožiwichu pjatk, dnja 4. meje 2018 w internaće Delnjoserbskeho gymnazija w Choćebuzu prezentaciju a wozjewjenje prěnjeho onlinoweho rěčneho kursa delnjoserbskeje rěče.

Runje tak kaž hižo w aprylu 2017 zawjedźeny kurs hornjoserbskeje rěče bu wón wot fachowcow multimedialneho centruma za nawuknjenje rěčow (MSZ) při Techniskej uniwersiće Drježdźany pod projektowym nawodom dr. Karin Schöne wuwity. Wobaj kursaj orientujetej so sylnje na rěčny certifikat wotpowědnje schodźenkej A1 Europskeho referencneho ramika (GER), kotryž bě Rěčny centrum WITAJ w lěće 2016 zdźěłał.

Zastupjerjo wšelakich kubłanskich zarjadnišćow wobhladuja poskitk jako zmysłapołne a praktikabelne rozšěrjenje a wobohaćenje wučby delnjoserbšćiny a su přeswědčeni wo tym, zo šulerjo jón derje přiwozmu.

Za hornjoserbski kurs "Serbšćinu online wuknyć" je mjeztym 650 aktiwnych wužiwarjow přizjewjenych. W mjenjenych měsacach bu kurs nětko za delnjoserbšćinu wuwity. Tak su so wobsahi pod wobkedźbowanjom wšitkich rěčnych wosebitosćow do delnjoserbšćiny přenjesli, zdźěla pak buchu nowe wuwite. K tomu słuša tež, zo buchu figury, městnosće a jednanja do Delnjeje Łužicy přepołožene a na lokalne wosebitosće kaž tež wašnja a nałožki wusměrjene. Při tym je tež tón abo tamny nowy comic nastał.

Zo by so serbska rěč dźeń a bóle tež w nowych elektroniskich medijach etablěrowała a tak jeje nałožowanje za přichodne generacije zawěsćiło, su fachowcy serbskich institucijow kaž Serbskeho instituta, Rěčneho centruma WITAJ, Instituta za sorabistiku při Lipšćanskej uniwersiće, Załožby za serbski lud a njewotwisni kompjuterowi fachowcy w lěće 2013 w zhromadnym dźěle wobšěrny koncept wuwili. Najwažniše wobsahi při tym běchu wudźěłanje tekstowych korpora, słownikow, kontrola prawopisa a gramatiki, onlinowy rěčny kurs, serbska digitalna biblioteka, onlinowa encyklopedija, wuwiće zhromadneje bazy serbskeje socialneje syće a nicnaposledk profesionelneho online-marketinga.

Na zakładźe koaliciskeho zrěčenja za lěta 2014-2019 mjez sakskej CDU a SPD přewostaja Swobodny stat Sakska k spěchowanju projekta "Serbska rěč w nowych elektroniskich medijach" w lětach 2015 do 2018 přidatne srědki we wysokosći lětnje 150 tysac eurow. Wot 2016 přizamkny so Zwjazk a spěchuje projekt ze cyłkownje 765 eurami. Kraj Braniborska přida w lětomaj 2017/18 dalše 161 tysac eurow. W hospodarskim planje załožby za běžne hospodarske lěto je za projekt 614 tysac eurow zaplanowanych.

Dotal bu za kompjuter prawopisna kontrola hornjo- a delnjoserbskeje rěče realizowana, bazěrowaca na pod www.soblex.de přistupnym morfologiskim generatoru. Dale je so kónc meje 2018 digitalna wučbnica "Serbsce DIGITALNJE krok po kroku wuknyć - prawopis a gramatika" zjawnosći přepodała. Tuta ma jako wučbu wudospołnjacy material k skrućenju prawopisa a gramatiki słužić a je zhromadny projekt Rěčneho centruma Witaj, Sakskeho ministerstwa za kultus, Załožby za serbski lud, Serbskeho instituta a agentury za młode medije KIDS interactive.

Za projekt bu wotpowědna fachowa přirada powołana. Wona poruči 2017 nimo toho zdźěłanje internetoweho portala z materialijemi k nawuknjenju serbskeje rěče w předšulskej starobje za kubłarki/kubłarjow a staršich. Prěnje wobsahi su pod www.dyrdomdej.de přistupne.

Serbski muzej w Budyšinje je w nalěću 2018 audioguide za dźěći předstajił a zjawnosći přepodał. Nimo toho prócuje so wo zestajenje portala k serbskim stawiznam města Budyšin.

Z předstajenjom schodźenka A1 delnjoserbskeje rěče je nětko runočasnje schodźenk A2 hornjoserbskeje rěče online přistupny, tohorunja wersija za smartphony dotal wozjewjenych třoch schodźenkow a schodźenk A1 z jendźelšćinu jako wodźacej rěču. Załožba za serbski lud prócuje so, z přidatnymi financnymi srědkami wobě rěči w elektroniskich medijach poněčim na runohódny schodźenk stajić.

Zajimcy namakaja rěčnej kursaj pod internetowej adresu www.sprachkurs.sorbischlernen.de.