Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Rěčny centrum WITAJ prezentuje přełožowanski program "sotra"

Budyšin,

Rěčny centrum WITAJ prezentuje přełožowanski program "sotra" za hornjoserbšćinu - němčinu a němčinu - hornjoserbšćinu

Rěčny centrum WITAJ prezentuje póndźelu, 22. měrca 2021, 10:00 hodź., we widejowej konferency prěni přełožowanski program "sotra" za hornjoserbšćinu - němčinu a němčinu - hornjoserbšćinu.

Zajimowani přihladowarjo móža so w podatym času pod live.witaj-sprachzentrum.de přizjewić.

Statna ministerka za kulturu a turizm Barbara Klepsch wobdźěli so na prezentaciji a rěči wo digitalizaciji serbšćiny, kotraž so mjez druhim na zakładźe wotpowědneho dojednanja w koaliciskim zrěčenju přez sakske statne knježerstwo spěchuje. Dojednanje w koaliciskim zrěčenju přinošuje k tomu, zo móže Załožba za serbski lud swoju koncepciju k "skrućenju prezency serbskeje rěče w nowych medijach" zwoprawdźeć, kotraž so wot lěta 2013 sem wuwiwa. Přełožowanske programy za hornjo- a delnjoserbsku rěč su wobstatk tuteje koncepcije.

Projektowy team Rěčneho centruma WITAJ je w zašłymaj lětomaj zakłady za přełožowanski program "sotra" w směromaj hornjoserbšćina - němčina a němčina - hornjoserbšćina nadźěłał. Program bazuje na korpusu něhdźe 200 000 serbsko-němskich sadowych porikow z rozdźělnych žiwjenskich wobłukow a wopřija bohaty wokabular a mnohe gramatiske formy.

Mašinelny přełožk realizuje so ze swobodnymaj přełožowanskimaj systemomaj MOSES a neuronalnym systemom OpenNMT. Z rozšěrjenjom bilingualneho korpusa ma so w přichodźe integracija do Microsoft bing-translatora a dalšich přełožowanskich systemow kaž google-translate docpěć.

Za pokročowanych wuknjacych rěčow su digitalne přełožowanske programy pomoc při pisanju tekstow, kotraž spěchuje jich motiwaciju. Za němskorěčnych wužiwarjow, kotřiž serbsce njerěča, je přełožowanski program wužitna pomoc při zrozumjenju spisanych tekstow w serbskej rěči. Přełožowanske programy maja motiwaciji přinošować, serbsku rěč w šulskim kaž tež w powołanskim a towaršnostnym žiwjenju nałožować.

Po prezentaciji přełožowanskeho programa "sotra" sćěhuje fachowa rozmołwa.

Přełožowanski program steji wot 22. měrca 2021 sem pod adresu: soblex.de/sotra darmotnje k dispoziciji.

Žurnalistow prosymy, zo woni swoje prašenja hač do 17.03.2021 na Rěčny centrum WITAJ pod e-mejlowej adresu: sekretariat@witaj.domowina.de pósćelu.