Přehlad nowinskich zdźělenkow Załožby
Přihoty za třikrajowu wustajeńcu wizuelneho wuměłstwa zahajene
Dnja 9. měrca tutoho lěta běše Załožba za serbski lud wupisała wubědźowanje wo wobdźělenje na wustajeńcy wizuelneho wuměłstwa 2019/2010 k temje "Wobrazy našeje krajiny. Bilder einer Landschaft. Slike različnih krajin."
Wubědźowanje je přihot na zhromadnu pućowansku wustajeńcu Załožby za serbski lud, Muzeja moderneho wuměłstwa Korutanska - MMKK w Celovcu/Klagenfurt (Awstriska) a Koroška galerije likovnih umetnosti - KGLU (Słowjenskokorutanska galerija rjanych wuměłstwow) w Slovenjim Gradecu (Słowjenska), kotraž ma so w zhromadnym dźěle ze Serbskim muzejom Budyšin a Serbskim muzejom Choćebuz realizować. 2019 ma so wustajeńca w Budyskim Serbskim muzeju a w Słowjenskokorutanskej galeriji rjanych wuměłstwow w Slovenjim Gradecu a 2020 w Muzeju moderneho wuměłstwa Korutanska a w Delnjej Łužicy pokazać. Flankěrować maja wuměłstwowu wustajeńcu zhromadne serbsko-słowjensko-korutanske projekty we wubłukomaj literatura a hudźba. Do projektowych partnerow za literaturu a hudźbu słušeja Musilowy dom a Hudźbne dźiwadło Gabriel w Celovcu, Dom Cenkarjeva w Ljubljanje a dalši.
Mjeztym je prěni schodźenk wubědźowanja za serbske wobdźělenje na wuměłstwowej wustajeńcy wotzamknjeny. Štwórtk, dnja 17. meje 2018, je jury w prěnim kole wo hač do 14. meje 2018 zapodatych powabjenjach rozsudźiła. Jury přisłušeja Jan Budar, direktor Załožby za serbski lud, Christina Boguszowa, direktorka Serbskeho muzeja Budyšin, Christina Kliemowa, kuratorka w Serbskim muzeju Choćebuz, dr. Marija Měrćinowa, wědomostna sobudźěłaćerka w Serbskim instituće w Budyšinje, Tomasz Nawka, zastupjer Zwjazka serbskich wuměłcow, dr. Andreja Hribernik, direktorka Koroška galerije likovnih umetnosti a mag. Christine Wetzlinger-Grundnig, direktorka Muzeja moderneho wuměłstwa Korutanska.
Na wubědźowanju wobdźěliło je so 12 jednotliwych wuměłcow/čow a 3 skupiny wuměłcow/čow. Zapodali su so cyle rozdźělne wuměłske koncepty - nimo rysowankow, grafikow a mólbow buchu wjacore instalacije za wustajeńcu namjetowane, mjez nimi dwě widejowej instalaciji kaž tež jedna interaktiwna audiowizuelna instalacija.
Ze cyłkownje 15 powabjenjow bu 8 za 2. schodźenk wubědźowanja namjetowanych. Wuzwoleni wuměłcy/če su prošeni, na swojich namjetach dale dźěłać a tute hač do 3. septembra 2018 k wospjetnemu posudźowanju jury předpołožić. Hakle potom so rozsudźi, kotre dźěła budu z wobstatkom třikrajoweje pućowanskeje wustajeńcy.