Přehlad nowinskich zdźělenkow Załožby
Přichod SAEK zaručić
Budyšin,
Na iniciatiwu direktora Załožby za serbski lud, Jana Budarja, zetkachu so wčera zastupjerjo přewažnje sociokulturnych centrow Hornjeje Łužicy, zo bychu so wo přichodźe SAEK wothłosowali.
„Prěnjorjadnje chcu za nas Serbow dotalne skutkowanje SAEK tež w přichodźe zaručić. Zdobom pak mam za wažne, zo so z akterami cyłeje Hornjeje Łužicy na zhromadne skutkowanje na polu medijoweho kubłanja dojednamy.“, praji Budar.
Nimo njeho wobdźělištaj so ze stron Serbow Michał Cyž a Dawid Statnik.
Přichodna widejowa konferenca wotměje so hižo za tydźeń, hdźež maja so prěnje po digitalnym puću zhromadźene naprawy diskutować.
Tuchwilna forma spěchowanja SAEK ke kóncej junija wuběži. Srědki za slědowace dwě a poł lěta SLM runje wupisa, próstwy z wotpowědnymi konceptami maja so hač do 16. měrca zapodać.