Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Posedźenje Załožboweje rady Załožby za serbski lud, 4.06.2021

Budyšin,

Temy:
Ramikowe žadanja na skutkowanje Serbskeho ludoweho ansambla (SLA) w přichodźe
Wobsadźenje wuměłskeho wjednistwa
Přepytowanje dźiwadłoweje krajiny w Kulturnym rumje Hornja Łužica - Delnja Šleska

Pjatk schadźowaše so Załožbowa rada Załožby za serbski lud na přeprošenje jeje předsydki Susann Šenkec. Běše to dalewjedźenje mejskeho posedźenja.

Hladajo na to, zo dźěłowe zrěčenje intendantki SLA, knjenje Judit Kubicec, kónc tuteje hrajneje doby wuběži, je Załožbowa rada w decembrje 2020 wočakowanje sformulowała, zo předpołoži so jej rozprawa dźěławosće intendantki, analyza potenciala a koncepcionelne namjety za wobsahowe dalewuwiće SLA. Direktor załožby dósta nadawk, do tutoho koncepta wuslědki rozmołwow ze sobudźěłaćerjemi SLA a posudźowanja dalšich fachowcow zapřijeć. Zjimajo praji Jan Budar k tomu: "Serbski ludowy ansambl měješe wot 1990tych lět sylny lutowanski kurs a wjacore změny we wjednistwje přetrać. Po hospodarskej konsolidaciji w poslednich lětach a tuchwilnym přetwarje k polěpšenju rumnostnych wuměnjenjow dyrbjał nětko fokus na stabilizowanju wuměłskeho nawoda kaž tež na wótřenju wobsahoweho profila a dalšeho wuměłskeho wuwića ležeć. Při tym měli so wšitke sparty zapřijeć."

Załožbowa rada wočakuje k wuzběhnjenju jónkrótnosće ansambla w přichodźe wobkedźbowanje slědowacych wobsahowych ćežišćow:

  • wusměrjenje na serbsku jewišćowu hudźbu a folklorne reje kaž tež na serbske a słowjanske kompozicije
  • wuslědźenje a wobdźěłanje dotal njeznateho resp. wuwiće noweho serbskeho repertoira
  • spěchowanje serbskich lajkow a serbskeho wuměłskeho dorosta
  • iniciěrowanje a podpěra serbskich kulturnych projektow
  • etablěrowanje mjeńšich kulturnych formatow w dwurěčnymaj Łužicomaj
  • skutkowanje jako pósłanc, tež w digitalnych medijach a hladajo na potenciale strukturneje změny
  • aktiwne wobdźělenje na wuwiću serbskeho kulturneho žiwjenja, wobkedźbujo wočakowanja wšelakich cilowych skupinow

Wuměłske wjednistwo SLA ma hač k posedźenju Załožboweje rady w nazymje 2021 konkretne naprawy kaž tež ramikowy hrajny plan předstajić, wobkedźbujo mjenowane ćežišća. Do koncepcionelnych přemyslowanjow maja so relewantne serbske zajimowe skupiny zapřijeć. Załožbowa rada wočakuje wot předsydstwa chóra a wot zawodneje rady domu, interne konflikty do zjawnosće njenosyć, ale je zhromadnje z wjednistwom domu konstruktiwnje rozrisać.

Załožbowa rada wobzamkny, tuchwilneho zastupjerja intendantki SLA, knjeza Tomaša Kreibicha-Nawku, k 1.08.2021 na dwě lěće komisarisce k intendantej SLA powołać. Zdobom ma direktor załožby zrěčenje z dotalnej překupskej jednaćelku, knjeni Dianu Wagnerowej, hač do 31.07.2023 podlěšić.

Direktor załožby Jan Budar informowaše Załožbowu radu nimo toho wo wuslědkach přepytowanja dźiwadłoweje krajiny w Kulturnym rumje Hornja Łužica - Delnja Šleska z dnja 01.12.2020, kotrež přewjedźe Mnichowska poradźowanska firma actori.

Facit Załožboweje rady je, zo njejsu strukturne naprawy, poćahowace so na cyły Kulturny rum Hornja Łužica - Delnja Šleska, za spjelnjenje specifiskeho nadawka Serbskeho ludoweho ansambla a serbskeho dźěla Němsko-Serbskeho ludoweho dźiwadła zmysłapołne. Wotwažować ma so, hač zamóže přirjadowanje ansambla wjetšim strukturam z wida jednotliwych wuměłcow šěrokosć repertoira a wuměłsku wšelakorosć kaž tež direktne přirunanje we wjetšim kolegiumje a z tym wuměłski narok zwyšić.

Zmysłapołne pak by było, ideju kulturneho ruma dale wjesć a wobstejacu mnohostronskosć prezentować z tym, zo so kooperaciske projekty wosebje z orchestrom, baletom a hudźbnym dźiwadłom iniciěruja. Město přesadźenja drastiskich strukturnych naprawow by zesylnjenje zhromadneho dźěła mjez SLA a Budyskim dźiwadłom załožbowemu zaměrej bóle wotpowědowało. Wuměnjenje za to pak je, zo sej wuměłski personal serbsku specifiku znutřkowni a ju jako jónkrótnosć aktiwnje dale wuwiwa.

Předsyda Kulturneho konwenta Hornja Łužica - Delnja Šleska a zastupowacy čłon Załožboweje rady, krajny rada Bernd Langa wočakuje wot Sakskeje, zo so kulturne rumy po wotběženju kulturneho pakta financielnje tak wuhotuja, zo so bohata wšelakorosć dźiwadłow w kulturnym rumje w jeje eksistency njewohrožuje.