Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Posedźenje Załožboweje rady

Na nazymske posedźenje Załožboweje rady přichodny štwórtk, dnja 08.12.2022 je jeje předsydka Susann Šenkec přeprosyła. We fokusu steji wobzamknjenje hospodarskeho plana 2023. Jeho zestajenje bě stupacych energijowych kóštow kaž tež njewšědneho zwyšenja tarifow a přiwšěm wobmjezowaneho financneho ramika dla wosebite wužadanje. Hospodarski plan twori zakład za spěchowanje załožby a wotwołanje srědkow pola pjenjezydawarjow.

Nimo dalšich prawidłownych temow wobsahuje dnjowy porjad tež rozprawu wjednistwa Serbskeho ludoweho ansambla k dotalnemu dźěłu a wusměrjenju, přiměrjenje mzdy sobudźěłaćerkow a sobudźěłaćerjow Ludoweho nakładnistwa Domowina, schwalenje projektow strukturneje změny za 2023 kaž tež aktualny staw a dalše postupowanje w twarskim projekće „Serbski forum wědy na Lawskim arealu“.

Posedźenje Załožboweje rady wotměje so wot 9:00 hodź. hybridnje w zarjedźe wokrjes Dubja-Błóta w Lubinje a online.

Dnjowy porjad - 1. dźěl posedźenja

  1. Konstituowanje
  2. Rozprawa załožbowych organow
  3. Kontrola wobzamknjenjow
  4. Rozprawa wjednistwa Serbskeho ludoweho ansambla ptzwr wo wobsahowym wusměrjenju a kónc zrěčenja wjednistwa k 31.07.2023
  5. Přiměrjenje mzdy sobudźěłaćerjow/kow Ludoweho nakładnistwa Domowina tzwr wot lěta 2023
  6. Změna wustawkow załožby (naćisk)
  7. Naćisk hospodarskeho plana za lěto 2023
  8. Strukturne srědki wotpowědnje § 17 čo. 31 InvKG – aktualny staw wobdźěłanja 2022 a spěchowanske próstwy wot 2023
  9. Staw „Serbski forum wědy na Lawskim arealu“
  10. Wšelčizny

2. dźěl posedźenja wotměje so w dalšim terminje kónc januara 2023.

______________________

Nowinarska konferenca

Popołdnju přizamknje so w Lubinje spožčenje Myta Miny Witkojc Berndej Pittkuningsej. Tohodla wotměje so nowinarska konferenca k posedźenju Załožboweje rady hakle
pjatk, 9. decembra 2022 w 9:00 hodź hybridnje w Serbskim domje w Budyšinje a online.

Přidatne daty za online přistup stajimy wam sčasom tu k dispoziciji.