Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Pokročowanje nazymskeho posedźenja Załožboweje rady 26.01.2023 w Budyšinje

Budyšin,

Štwórtk, 26.01.2023 schadźowaše so Załožbowa rada w Serbskim domje w Budyšinje k pokročowanju swojeho nazymskeho posedźenja, na kotrež běše předsydka rady Susann Šenkec přeprosyła. Na posedźenju rozprawjachu serbscy radźićeljo kaž tež direktor załožby Jan Budar wo swojej dźěławosći. Dalše temy běchu wutworjenje digitalneho konsorcija, zakónčenje twarskich dźěłow w ansamblu a změna wustawkow załožby.

Powitanje

Na posedźenju Załožboweje rady wobdźělichu so zastupjerki a zastupjerjo Serbow, direktor załožby Jan Budar, předsyda Parlamentariskeje přirady Marko Šiman, zastupjerjo Sakskeho ministerstwa za financy (SMF), Sakskeho ministerstwa za wědomosć, kulturu a turizm (SMWKT), ministerstwa za wědomosć, slědźenje a kulturu kraja Braniborskeje (MWFK), Zwjazkoweho ministerstwa za nutřkowne, kaž tež měšćanosta Lubnjowa Helmut Wenzel, wyši měšćanosta Budyšina Karsten Vogt a k prěnjemu razej tež krajny rada wokrjesa Budyšin Udo Wićaz.

Rozprawy

Dokelž skónči so w nalěću legislaturna perioda serbskich radźićelow w Załožbowej radźe, rozprawjachu woni wo swojej dźěławosći, kaž běchu to w nazymje hižo před Zwjazkowym předsydstwom Domowiny a před Radu za naležnosće Serbow činili. Při tym narěčachu wosebje wulke wužadanja a zhladowachu zdobom na docpěte wukony. Woni kritizowachu, zo je so dźěłowy pensum přez wulkoprojekt "Serbski forum wědy při Lawskim arealu" a přidatne wobdźěłanje srědkow ze strukturneje změny za radźićelow drastisce powyšił. Woni namołwjachu, strukturu zarjada tak zesylnić, zo móža sobudźěłaćerjo tež w přichodźe wšitke nadawki derje spjelnić. Sebastian Hecht ze Sakskeho ministerstwa za hospodarstwo, kulturu a turizm, dźakowaše so jim za spomóžne dźěło a zwurazni, zo su serbscy radźićeljo žro Załožboweje rady.

Tež direktor załožby Jan Budar rozprawješe wo swojej dźěławosći a rysowaše při tym dobre wuwiće załožboweho zarjada w poslednich lětach, wosebje na polu digitalizowanja procesow. Při tym wuzběhnje, zo ma załožbowy zarjad dźeń a wjace nadawkow spjelnić a zo su wočakowanja na direktora jara wulke. Wjetšina radźićelow pokaza so jara wotewrjena, zarjad při nadawkach podpěrać.

Digitalizacija

Dalši wulki tema posedźenja bě digitalizacija. K tomu předstajištaj Wito Bejmak, lawreat myta Zejlera 2022 zhromadnje ze serbskim radźićelom Julianom Nyču swoje ideje wo natwarje nošneje struktury, kiž ma w přichodźe serbske digitalne projekty koordinować a přesadźeć a při tym wšitkich akterow na polu digitalizacije zapřijeć. Direktor załožby dósta nadawk, nětko hač do nazymskeho posedźenja z idejow koncept wuwiwać dać, kak móhła nošna struktura k dołhodobnemu přesadźenju serbskich digitalizaciskich projektow wupadać.

Twarske naprawy

K zakónčenju twarskich naprawow při ansamblu poda Jan Budar přehlad wo srědkach a zdźěli, zo bě twar dla stupacych kóštow někak 400 tysac eurow dróši hač planowany. Přez přidatne srědki Sakskeje, Kulturneho ruma a załožby pak móžeše so tutón deficit wurunać. Rada chwali dobre financne rozrisanje a wukon imobilijoweho wotrjada załožby.

Wustawki załožby

Nimo toho schwali Załožbowa rada změny we wustawkach załožby. W nich je so posedźenski pjenjez za čestnohamtskich radźićelow zwyšił, kaž tež měsačna pawšala zawjedła. Wysokosć zapłatka orientuje so po wustawkach wokrjesneho sejma a měšćanskeje rady. Měsačna pawšala wučini 25,00 €/měsac a posedźenski pjenjez powyši so na 75,00 € za radu, 50,00 € za komisiju kaž tež za projektowu přiradu. Wustawki so nětko přez SMWK pruwuja, potom je załožba w hamtskich łopjenach Sakskeje a Braniborskeje wozjewi, tak zo potom wot 01.03.2023 płaća.

Artikl w Serbskich nowinach: Serbscy radźićeljo su "wutroba" załožboweje rady, ale hišće nic "organ"

Tež Serbski rozhłós je wo posedźenju rozprawjał. Přinošk móžeće sej tule naposkać: Zymske posedźenje Załožboweje rady