Na wčerawšim (14.06.) počesćowanju dobyćerskeho naćiska z wubědźowanja architektow za twarski projekt “Serbski forum wědy na Lawskim arealu” w Budyšinje dźakowaše so direktor załožby Jan Budar wšitkim wobdźělnikam wubědźowanja. Po krótkim wotrysu dotalneho wuwića projekta přepoda wón słowo Drježdźanskemu architektej Lürej Meyer-Bassinej. Fachowc bě hač dotal projekt přewodźał a bě čłon mytowanskeje jury, kiž bě w swojim posedźenju 1. junija dobyćerski naćisk wuzwoliła.

Knjez Meyer-Bassin rozkładźe skrótka postupowanje we wubědźowanju architektow a wuzběhny, zo su wšitke zapodate naćiski wysokeje kwality. Wosebje w detailach je spóznajomne, zo su so architekća intensiwnje z podatym nadawkom a wupisanymi wuměnjenjemi rozestajili. Po tym předstaji wón naćiski, kiž běchu sej třeće, druhe a prěnje městno wudobyli. Při tym wujasni tež, kajke kriterije běchu na kóncu za wólbu dobyćerja rozsudne. Jadro nadawka bě, wotmołwu na prašenje namakać, što woznamjenja poprawom serbski forum wědy. W nim měli wosebite efekty mjezsobneje synergije mjez Serbskim muzejom a Serbskim institutom nastać, kiž zhromadnje do foruma zaćehnjetaj. Wulke wužadanje pak wurosće z toho, zo rěči so wo domach na ležownosćach, kiž mjezsobu njezwisuja. W dobyćerskim naćisku wuzběhny Meyer-Bassin wrotowy wobłuk, kiž je typiski za staroměšćansku architekturu Budyšina a je zdobom zwjazowacy element mjez zachodomaj foruma (Lawske hrjebje a Stara póštownja na Hošic hasy). Rumnostny koncept wotpowěduje we wulkej měrje předstawam a potrjebam institucijow, nutřkowne dwory wožiwjeja forum a tworja městnosće za zetkawanje. Aspekt naslědneho twarjenja pokaza so wosebje w tym, zo so stare twarjenje na Lawskich hrjebjach zdźerži a wobnowi. Dobyćerski naćisk twori dobry zakład za dalše planowanja, skići pak zdobom dosć móžnosćow za dalewuwiće.

W měnje załožby, kotraž je twarski knjez foruma, dźakowaše so Jan Budar wšitkim, kiž załožbu podpěraja a projekt zmóžnja. “Tajki wulkoprojekt móže so jenož zwoprawdźić, hdyž wšitcy zhromadnje na realizaciji dźěłamy!” rjekny. Po tym gratulowaše Rainerej Hofmannej, jednaćelej architektoweho běrowa bogevischs buero z Mnichowa k dobyćerskemu naćiskej. Počesćeny dźakowaše so a pokaza na wosebite wužadanje wubědźowanja, wšako njemějachu do zapodaća ani kontakt ze Serbami ani z institucijomaj, a wjeseleše so ćim bóle, zo je běrow z naćiskom mytowansku jury přeswědčił. Intensiwne zhromadne dźěło běchu architekća a instituciji wčera do počesćowanja z wopytom w Serbskim instituće a w Serbskim muzeju zahajili.

Wšitke zapodate naćiski wubědźowanja su hač do 3. julija na žurli Serbskeho domu a w SKI w Budyšinje wustajene. Wustajeńca je dźěłań dźeń wot 9:00 hodź. do 16:30 hodź. wotewrjena. Zajimcy su wutrobnje přeprošeni!

Čitajće k tomu tež artikl w Serbskich nowinach: "Za naćisk ze „šarněrom“ - Mnichowski architektny běrow wčera dobyćerske wopismo přijimał"(15.06.2023)

Wšitke mytowane naćiski smy tež na našej Instagram stronje wozjewili.