Nowy label "Sorbian Music" je so załožił a poskića wotnětka na wšěch znatych streamingowych platformach wothrawanje serbskeje hudźby a dalšich awdijowych produkcijow, kotrež je Załožba za serbski lud hdy produkowała abo spěchowała. Label zapřijima wšelake žanry wot klasiki přez rock a pop hač k słuchohram a bajkam.

Na internetowej stronje www.sorbian-music.net namaka zajimc 20 z dotal wot załožby wudatych abo spěchowanych a přehladnje zestajanych produkcijow. Tři z tutych so hižo na streamingowych platformach k wothrawanju poskićeja. Dalše sćěhuja, ručež su wšě prawa za wozjewjenje a wužiwanje rozrisane. Nimo swójskich produkcijow su na internetowej stronje tež wideja serbskich hudźbnikow zawjazane. Zaměr je, bohatosć a wšelakorosć serbskeje hudźby wuzběhnyć a powabić.

Wobsahowe wužadanja běchu wulke. Tak dyrbjachu so daty produkcijow technisce wobdźěłać a swójski label "Sorbian Music" załožić. Wo rozšěrjenje datow na znatych streamingowych platformach kaž Spotify, Amazon Music, Deezer, Google Play, Apple Music a druhich so Berlinska firma Zebralution tzwr postara. Wona je jedna z wodźacych firmow na polu rozšěrjenja digitalnych medijow a specializowana na to, repertoir hudźbnych labelow tež digitalnje poskićeć. Najwjetši problem při techniskim wobdźěłanju mějachu ze serbskimi pismikami, štož pak přez dalewuwiće programa rozrisachu.

Runočasnje k projektej je so z tym započało, wšě dotal wot Załožby za serbski lud produkowane resp. spěchowane awdija we formje datoweje banki katalogizować a kategorizować.

Katharina Čornakowa, koordinatorka projekta, wjeseli so přez wozjewjenje: "Z projektom Sorbian Music zmóžnimy lochki a moderny přistup k serbskim awdijam, takrjec serbska hudźba ze zaka - hnydom a wšudźe."

Kontakt za naprašowanja:
Załožba za serbski lud
Katharina Čornakowa
telefon: 03591 550 310
mejlka: Cornak-Stiftung@sorben.com