Syman Pětr Cyž budźe wot 1. junija 2020 nowy jednaćel Ludoweho nakładnistwa Domowina. Wotpowědne zrěčenje z towaršnikom LND, Załožbu za serbski lud, bu 2. měrca w Budyskej Smolerjec kniharni podpisane.

42-lětny fachowc na polu wabjenja a marketinga je mjez druhim komunikaciske wědomosće studował a dźěła wokomiknje w Berlinskej wabjenskej agenturje pioneer communications. Znaty bu Cyž w Budyšinje a Łužicy naposledk přez swoje sobudźěło na kampanji k skrućenju serbskeje rěče sakskeho Statneho ministerstwa za wědomosć, kulturu a turizm "Sorbisch? Na klar."

Wobsadźenje městna bu trěbne, dokelž so dotalna jednaćelka Marka Maćijowa kónc meje 2020 na wuměnk poda.