Daniel Zoba je wot 01.07.2021 społnomócnjeny za digitalizaciju při Załožbje za serbski lud. Jedyn z nadawkow je přesadźenje prěnich naprawow digitalizaciskeho koncepta, kiž je w zamołwitosći swobodneho poradźowarja Měrko Šenka nastał. Dale ma so 45-lětny wo koordinaciju digitalizaciskich aktiwitow serbskich institucijow, wo centralne dalekubłanja na tutym polu a wo dalše strategiske wusměrjenje digitalizacije starać. Daniel Zoba je čłon projektoweje skupiny Rapaki a w njej zamołwił technisku realizaciju serbskeje hry Krabat. Za čas swojeho studija je so mjez druhim zaběrał ze spóznawanjom serbskeje rěče.

K 01.07.2021 přewozmje Załožba za serbski lud najprjedy hač do kónca lěta Budyske studijo SAEK z wulkim dźělom techniskeho wuhotowanja a studijowym nawodu Michałom Cyžom do 4. etaže Serbskeho domu. Kónc junija 2021 je wuběžało spěchowanje SLM (Sächsische Landesmedienanstalt) za SAEK Sakskeje, tež studijo w Budyšinje je so zawrěło. Załožbowi radźićeljo dorozumichu so na swojim posedźenju w meji wo móžnosći, skutkowanje SAEK, poćahujo so na serbske aktiwity, zdźeržeć a při tym najwažniše wobłuki wutwarić a na cyłu Łužicu rozšěrić. Wotpowědny koncept ma hač do nazymy nastać, to zo móhła so k 01.01.2022 nowa nošna struktura za serbske medijo-pedagogiske poskitki wutworić.

Do nadawkow Michała Cyža słuša hłownje koncepcionelne wuwiwanje, organizacija a přewjedźenje serbskich medijo-pedagogiskich projektow za šulerjow a młodostnych, potrjebam přiměrjene medijo-pedagogiske dalekubłanja za dorosćenych, medialny přewod zarjadowanjow (livestreaming, dokumentacija) a medijowe produkcije.