Wutoru, dnja 23.05.2023 wotmě so w Serbskim domje w Budyšinje nalětnje posedźenje Załožboweje rady. W prěnim dźělu posedźenja zakónčichu dotalni serbscy radźićeljo swoje dźěło a přepodachu nadawki swojim naslědnikam. Zapósłanc Sakskeje Marko Šiman a direktor załožby Jan Budar dźakowaštaj so wutrobnje radźićelam, wosebje pak Susann Šenkec za jeje wustojne dźěło jako předsydka rady w poslednimaj legislaturomaj a Bjarnatej Cyžej, kiž po 32 lětach swój mandat w radźe złoži.

Po konstituowanju noweje Załožboweje rady za legislaturu 2023 – 2027 wuzwolichu sej čłonki a čłonojo Marka Kowarja jako noweho předsydu. Jeho zastupujetaj wyši měšćanosta Budyšina Karsten Vogt a měšćanosta Lubnjowa Helmut Wenzel. (wo zestawje Załožboweje rady móžeće tu čitać.)

W posedźenju přihłosowachu radźićeljo wšelakim změnam w směrnicy załožby, kaž tež w směrnicomaj za strukturne srědki. Změny mjez druhim zaruća, zo towarstwa tež w přichodźe njetrjebaja swoje projekty předfinancować, kaž to nowe předpisy w hospodarskim porjedźe Sakskeje poprawom předwidźa. Próstwustajerjo za strukturne srědki Sakskeje pak měli wobkedźbować, zo so přez změnu směrnicy termin zapodaća próstwy na 31. julij přesunje. Dale je Załožbowa rada spěchowanskej koncepciji za strukturne srědki wobzamknyła, hdźež su wuměnjenja, postupowanje a kriterije spěchowanja bliže wopisane.

W dalšim dypku dnjoweho porjada rozprawješe jednaćel LND Syman Pětr Cyž wo wusměrjenju nakładnistwa a wo stawje přiměrjenja tarifow. Radźićeljo rozmołwjachu so z nim tež wo tuchwilnej napjatej personelnej situaciji w nakładnistwje. Woni rozsudźichu, zo ma sej direktor za posudźowanje situacije hač do spočatka julija wot zawodneje rady, přirady, eksterneje mediatorki a jednaćela dalše rozprawy wuprosyć. Jednaćel ma nimo personalnych naležnosćow zdobom nadawk, dale intensiwnje na zawjedźenju noweho tarifa dźěłać.

Staw twarskeho projekta “Serbski forum wědy na Lawskim arealu” předstaji radźićelam knjez Branczeisz wot firmy WEP, kiž projekt wot lětušeho měrca přewodźa. Architektowe wubědźowanje je mjeztym zakónčene. Cyłkownje su so 18 namjetow zapodali. Přichodny tydźeń, 1. a 2. junija, schadźuje so komisija, kiž wo mytowanju rozsudźi. Po posedźenju budźe załožba wšitke zapodate modele zjawnje spřistupnić a w Serbskim domje wustajeć. Dobyćerski naćisk twori zakład za dalše planowanske a přizwolenske kroki. Wysoka šula Zhorjelc/Žitawa projekt z energetiskim konceptom přewodźuje.

Dalše temy posedźenja běchu wotličenje hospodarskeho lěta 2022 a wužiwanje zbytnych srědkow,  wuswobodźenje přirady LND kaž tež přirady Serbskeho ludoweho ansambla z rukowanja za hospodarske lěto 2021 a wuswobodźenje direktora z rukowanja za hospodarske lěto 2019.

Do přirady Serbskeho ludoweho ansambla je rada knjeza Michaela Apela jako zastupjerja z Braniborskeje powołała. Wón naslěduje knjeni Claudiju Drews, kiž je so na wuměnk podała.

Protokol wobzamknjenjow:

• protokol wobzamknjenjow Załožboweje rady wot 23.05.2023 (němsce, PDF)

Dalše rozprawy w medijach:

• Na wulke wuspěchi nawjazać: Załožbowa rada z nalětnim posedźenjom nowu wólbnu dobu zahajiła (Serbske nowiny, 24.05.2023)

• Z nalětnjeho posedźenja Załožboweje rady (MDR Serbski rozhłós, 24.05.2023)

• Pśetwarjenje Ludowego nakładnistwa Domowina - tema na pósejźenju Załožboweje rady (RBB Serbski program, 24.05.2023)