Wužiwarjo nowšich wersijow programoweho paketa Microsoft Office smědźa so wjeselić. Tež woni móža nětko awtomatisku serbskorěčnu prawopisnu kontrolu wužiwać. Dźakowano skutkownej podpěrje knjeni dr. Marion Kremer, kotraž dźěłaše dlěši čas za Microsoft Corporation, je so Załožbje za serbski lud 2017 poradźiło, trěbny grat za wudźěłanje prawopisneho modula za Microsoft Office 2013 a Office 2016/365 licencować. Tutón móže so nětko za wobě serbskej rěči wužiwać. Dotal wužiwajomne graty podpěrachu jeničce Microsoft Office 2010.

W nadawku Załožby za serbski lud je specialist na polu informaciskeje technologije Bernhard Baier na zakładźe słowoskłada morfologiskeho generatora wotpowědny modul za prawopisnu kontrolu zdźěłał. Wón wopřija wšitke słowne kaž tež fleksiske formy a je pod www.soblex.de přistupny.

Modul bazuje na aktualnym, wot wědomostnikow Serbskeho instituta pruwowanym a korigowanym hornjoserbsko-němskim prawopisnym słowniku.

Wšitke tute dźěła buchu we wobłuku wulkoprojekta "Serbska rěč w nowych elektroniskich medijach" přez Załožbu za serbski lud podpěrane. Za njón steja wot lěta 2015 sem hač do 2018 přidatne srědki Swobodneho stata Sakskeje, Kraja Braniborskeje a Zwjazka k dispoziciji.

Nowa prawopisna kontrola je pod rubriku "download" na internetowej stronje www.soblex.de přistupna a hodźi so wotpowědnje instrukciji na swójskim kompjuteru zarjadować.