Java Script ist deaktiviert!

Damit die Seite mit vollem Funktionsumfang korrekt dargestellt werden kann, muss Java Script aktiviert sein.

Přehlad nowinskich zdźělenkow Załožby

 

Nachwilne hospodarjenje zakónčene - zwjazkowy etat 2022 prawomócny

Srjedu, 22.06.2022, bu Zwjazkowy hospodarski zakoń 2022 w zwjazkowym zakonskim łopjenu wozjewjeny a je z tym prawomócny. Na zakładźe wólbow do Zwjazkoweho sejma nazymu 2021 bu etat běžneho lěta hakle 03.06.2022 wobzamknjeny. Po wobkrućenju přez Zwjazkowu radu 10.06.2022 a podpisanju přez zwjazkoweho prezidenta 19.06.2022 nabudźe etatowy zakoń z wozjewjenjom w zwjazkowym zakonskim łopjenu kaž planowane wróćo skutkujo k 1. januarej 2022 płaćiwosće.

Z płaćiwosću hospodarskeho zakonja zakónči so tak mjenowane nachwilne hospodarjenje. Dołhož zwjazkowy etat hišće wobzamknjeny njebě, dowoli artikl 111 Zakładneho zakonja zwjazkowemu knježerstwu, we wobmjezowanym wobjimje srědki wudawać a kredity brać. Tole je wosebje w lětach po wólbach Zwjazkoweho sejma z wašnjom, dokelž njemóže nowy parlament etat hižo w decembru w předpolu hospodarskeho lěta wobzamknyć.

Za załožbu buchu nimo přiražki wotpowědujo 4. financnemu zrěčenju (11.958,0 TEUR) tež přidatne pjenjezy za konkretne projekty digitalizacije (195,0 TEUR), kotrež buchu hižo 2021 etatizowane, znowa wobzamknjene. Z tutymi přidatnymi srědkami móže so nětko wosebje awtomatiske spóznawanje rěče a mašinelne přełožowanje dale wuwiwać.

Što rěkaše nachwilne hospodarjenje za załožbu? Wona smědźeše jenož spěchować, za čož wobsteji prawniska winowatosć. To je na př. institucionelne spěchowanje serbskich institucijow abo spěchowanje dale wjeducych projektow. Z tuteje přičiny njesmědźachu so nowe projekty přizwolić a tež naprawy z přidatnych srědkow za strukturnu změnu (§ 17 čo. 31 InvKG) nic kaž planowane k 01.01.2022, ale hakle k 01.07.2022 zahajić.