Myto Ćišinskeho 2019 Załožby za serbski lud spožči so Mari Elikowskej-Winklerowej. Tole rozsudźi kuratorij k spožčenju Myta Ćišinskeho na swojim posedźenju minjenu póndźelu, dnja 24. junija 2019 w Budyšinje.

Delnjoserbska wučerka a žurnalistka z pólskimi korjenjemi dóstanje tute wysoke počesćenje za jeje dołholětne a njesprócniwe skutkowanje za zdźerženje a daledawanje delnjoserbskeje rěče we wšitkich generacijach kaž tež za wobstajnu podpěru serbskich kulturnych a trajnych projektow w Delnjej Łužicy.

Spěchowanske myto k Mytu Ćišinskeho spožči so teamej Radija Satkule, młodźinskeho wusywanja MDR-Serbskeho rozhłosa. Dlěje hač 20 lět hižo prezentuja młodźi Serbja, mjez nimi šulerjo, wučomnicy a studenća, na zajimawe a originelne wašnje młodźinske temy w hornjoserbskej rěči w rozhłosu, nowych medijach a na zjawnych zarjadowanjach. Z tym přinošuja njeparujomnje k skrućenju narodneho wědomja a identity mjez młodej serbskej generaciju.

Hłowne a spěchowanske Myto Ćišinskeho přepodatej so w druhej połojcy oktobra w ródnej wsy basnika, w Pančicach-Kukowje.