Přehlad nowinskich zdźělenkow Załožby
Lós wo wobdźělenju rozsudźił
Budyšin,
Lós je rozsudźił, kotre architekturne běrowy smědźa so na architekturnym wubědźowanju za „Serbski forum wědy při Lawskim arealu“ w Budyšinje wobdźělić. Wulosowanje wuwjedźeštaj Jan Budar a Michaela Mošowa wot Załožby za serbski lud pod dohladom knjeza Rau a knjeni Koschniki wot RAU ARCHITEKTEN, kotřiž wubědźowanje přewodźeja.
Zo by so najlěpši architekturny naćisk za kompleksne twarske předewzaće namakał a so rozdźělne naroki Serbskeho muzeja a Serbskeho instituta wobkedźbowali, přewjedźe so za zeskutkownjenje twarskeho předewzaća „njewotewrjene wubědźowanje wo realizaciju“ (Realisierungswettbewerb RPW 2013 § 3).
Zajimowani architekća smědźachu so hač do 08.12.2022 požadać a zdobom wozjewić, zo bychu so na wubědźowanju chcyli wobdźělić. Dohromady 113 požadanjow su dóšli, 5 próstwow pak njewotpowědowachu wupisanym minimalnym kriterijam. Z požadanjow su nětko 20 běrowow a 5 naslědnikow wulósowali.
21.12.2022 so wupisanje architekturneho wubědźowanja wozjewi.
Čas požadanja traje hač do 17.03.2023, 12.00 hodź., modele smědźa so hač do 06.04.2023, 12.00 hodź. wotedać.
Z wozjewjenjom dobyćerskeho naćiska liča projektowi parnerjo srjedź meje 2023.