Myto Ćišinskeho 2023 Załožby za serbski lud spožči so w nazymje (14. oktobra 2023) Jurijej Łušćanskemu za jeho mnohostronske płódne kulturne a wuměłske skutkowanje a za wobstajne wudźeržowanje stykow k słowjanskim susodam na dobro serbskeho ludu.

Spěchowanske myto Ćišinskeho 2023 spožči so Gregorej Kliemej za jeho kreatiwne a zahorjace kulturne dźěło, za zamóžnosć, wšitke generacije zwjazować kaž tež inowatiwne hudźbne projekty zeskutkownjeć.

Tole rozsudźi kuratorij k spožčenju Myta Ćišinskeho na swojim posedźenju wčera, 2. meje 2023 w Budyšinje.

Swjatočnosć k spožčenju mytow budźe 14. oktobra 2023 w Smochčanskim kubłanišću swj. Bena.
Předsydka kuratorija Susann Šenkec zdźěli, zo je społnomócnjena zwjazkoweho knježerstwa za prašenja wusydlencow a narodnych mjeńšinow, knjeni Natalie Pawlik, wobdźělenje na njej připrajiła a budźe myće přepodać.