Myto Ćišinskeho 2021 Załožby za serbski lud spožči so Trudli Malinkowej a Janej Malinkej za jeju wusahowacu publicistisku dźěławosć na polu serbskich kulturnych stawiznow a jeju wosebity angažement we wědomostnym towarstwje Maćica Serbska, w Serbskim ewangelskim towarstwje kaž tež za jeju politisko-narodne skutkowanje.
Tole rozsudźi kuratorij k spožčenju Myta Ćišinskeho na swojim posedźenju wčera wutoru, dnja 22. junija 2021 w Budyšinje.

Spěchowanske myto Ćišinskeho 2021 spožči so Jadwize Kaulfürstowej a Dr. Fabianej Kaulfürstej za jeju horliwe, mnohostronske skutkowanje na polu serbskeje rěče a kultury, za zwoprawdźenje kreatiwnych projektow a za twarjenje mostow mjez Serbami a Słowjanami.

Po lońšej změnje wustawkow dotěruje so Myto Ćišinskeho nětko z 12.000,- eurami, Spěchowanske myto Ćišinskeho ze 4.000,- eurami. Wobě myće spožčitej so z wopismom a čestnej jehłu z podobiznu Ćišinskeho dnja 16.oktobra 2021 w Serbskim muzeju w Budyšinje.