Nic jenož naše wšědne žiwjenje so dale wuwiła, druhdy stanje so to samo z bajowymi figurami: Dopomńmy so na lěto 1714: “Awgust Sylny so porjadnje złobi. Łužica ćerpi pod kwaklu jeho nahrabnych knježkow, ale njenadźicy torha stara serbska móc wo wrota k sakskemu mócnarjej. Prawy čas za nowe dyrdomdejstwa, nowych přećelow a njepřećelow, prawy čas za ... Krabata!” (citat z přiručki za kompjuterowu hru 2015)

W lěće 2015 wotewrě so Krabatej na tymle městnje digitalny swět a kóždy fan kompjuterowych hrow zamó so do Krabatoweho uniwersuma zanurić. Serbski dyrdomdej za domjacy kompjuter bě znowa zrodźeny, z hornjoserbsce rěčanym słowom a delnjoserbskej a němskej tekstowej wersiju.

Časy so měnjeja a Krabat je dźeń a mobilniši. Wot dźensnišeho móžemy Krabatej po boku wojować, hłójčku napinać, mudrje jednać ... a to wšitko nětko tež w mobilnymaj wersijomaj za Apple a Google. Hra RAPAKOW “KRABAT a potajnstwo serbskeho krala” z lěta 2015 je nětko w online kupnicach instalowana. Wobě wersiji płaćitej 5,99 EUR, při čimž je hra hač do 1. stawa darmotna.

Załožba za serbski lud je nadawk sformulowała a hižo znaty, etablěrowany team RAPAKOW je jón zeskutkownił. Jörg Hübner, projektny a wuměłski nawoda skupiny k tomu: "Přesadźenje našeje kompjuteroweje hry na mobilne nastroje je atraktiwny poskitk w načasnych medijach a pomha zdobom zajim za serbsku kulturu we Łužicy a zwonka njeje budźić. Wuwiće kompleksneje elektroniskeje hry z poměrnje małym mustwom a w swobodnym času bě při tym wulke organizatoriske kaž tež časowe wužadnje - tohodla wulki dźak na cyłu projektowu skupinu, pomocnikow, testerow a spěchowarjow."

Kontakt za naprašowanja:

Załožba za serbski lud
Michaela Mošowa
telefon: 03591 550320
moosche-stiftung@sorben.com
stiftung.sorben.com

RAPAKI
Jörg Hübner
telefon: 0178 3563765
joerg@rapaki.de
www.rapaki.de